تحدث باستفاضه يقص عليه ما قصه على جنه سابقا بانقاذه للكابو الحالى و نشأ علاقه صداقه وطيده بينهما ليردد بتاكيد
# يعنى كل علاقتى بيهم هى الصداقه و بس
رددت جنه باستخفاف
# برده حتفضل تاجر سلاح
كور قبضه يده محاولا التقاط انفاسه الهاربه و ردد بثقه زائفه
# انا تعبت كتير اوى فى حياتى يا جنه…و حقيقى انا مخترتش الطريق ده
زفر بانفاس حارقه و لمعت عيناه بعبرات مكتومه و اكمل
# دى تجاره عيلتى من عشرات السنين و كل رجاله العيله بتطلع تشتغل فيها و عندنا فى الصعيد الشغل ده تجاره و مش معترفين ابدا انها حاجه غلط
جلس على الاريكه و تنهد باجهاد و رمقها بنظراته العاشقه و هتف بتساؤل
# انتى ايه اللى يرضيكى يا جنه؟ لو عيزانى ابطل الشغل ده حبطله، حتى لو كان على حساب علاقتى باهلى
اقترب منه محسن و جلس الى جواره و هتف بصوت هادئ
# انت انسان كويس جدا يا سليم و حرام عليك تضيع نفسك فى شغلانه خطر بالشكل ده
اجابه على الفور
# كل همى فى الوقت اللى مسكت فيه شغل العيله هو انى اعلى فى نظرهم، عارف ليه يا عمى؟
ابتسم بمراره و اردف
# عشان انا كنت طول عمرى الفرد المنبوذ فى العيله، ابن المصراويه اللى مكروه من الكل حتى من اخواته و فى الاخر ملقتش غير الطريق ده عشان يحسو بوجودى و يعرفو قيمتى