سراج طلع علبة قطيفة فيها خاتم دهب رقيق ولبسهولها في إيدها وقال لها: “ده وعد جديد مني إنك هتفضلي الملكة الوحيدة اللي متربعة على عرش قلبي طول العمر”
وباس راسها بحب كبير وطول في الحضن خلى حنان تحس إن العالم كله وقف في اللحظة دي وإن مفيش أي قوة تقدر تفرقهم عن بعض
في لندن كانت ماهيتاب قاعدة في شقتها الفاخرة وماسكة قدح القهوة بملامحها الأرستقراطية الهادية.
هي خلاص نسيت موضوع بنتها ميساء وسلمت قضاها لله إنها ماتت وعايشة حياتها بهدوء. مع شروق البنت اللي عندها *18* سنة وبنت صاحبتها اللي ماتت.
وماهيتاب بتعاملها كأنها بنتها شروق دخلت عليها وهي بتضحك وقالت: “مامي ماهيتاب يا سكرة سيبي القهوة المرة دي وتعالي نتفرج على فيلم سوا “
ضحكت ماهيتاب وقالت لها “يا شروق إنتي اللي سكرة ومحلية أيامي بس قوليلي يا بنتي جابر وزهرة مكلمونيش بقالهم أسبوع ليه تفتكري زعلانين مني. “
شروق باست إيدها وقالت لها: “يا مامي أكيد مشغولين وإنتي عارفة إنهم بيحبوكي.”
ماهيتاب هزت راسها وقالت:”يا رب يكونوا بخير أنا خلاص ماليش في الدنيا غيرهم وغيرك إنتي يا شروق. “
في فيلا المعلم العزومة بدأت….. والناس ملت المكان والكل كان مستني يشوف مين ميساء اللي يعرفوا أنها ماتت من زمان.