سراج قرب منها أكتر وهمس قدام وشها وهو عينه بتلمع بالحب وقال: “سلامة قلبك من الخضة يا روح قلب سراج هو أنا أقدر أخضك ده أنا جيت عشان أشوف الضحكة اللي بتنور يومي إنتي مش عارفة الأسبوع ده مر عليا إزاي وأنا مش عارف أنفرد بيكي من دوشة العزومة دي “
حنان وشها بقى أحمر وزقت صدره بدلع وقالت: “بطل يا سراج حد يشوفنا والناس والخدم رايحين جايين يقولوا إيه علينا بس”
سراج ضحك وشدها ليه أكتر وباس إيدها بحنان وطول في البوسة وقال: ” يقولوا اللي يقولوه يا حنان إنتي قلبي وروحي وكل دنيتي أنا مستني اللحظة اللي تخلص فيها العزومة دي عشان هقول لأبوكي نعمل الفرح اخر الاسبوع وأشبع من كلامك ومن عيونك اللي بتسحرني دي النهاردة طالعة زي الملاك بالفستان ده وخلتيني مش شايف حد غيرك إنتي عارفة يا حنان إن ضحكتك دي هي اللي بتخليني أقدر أكمل يومي وسط ضغط الشغل والمسؤولية أنا بجد بحمد ربنا كل يوم إنك بقيتي من نصيبي “
حنان سندت راسها على كتفه وغمضت عينيها براحة وقالت: “ربنا يخليك ليا يا سراج وميحرمنيش من حنيتك دي أبداً أنا كمان كنت مستنية اللحظة دي عشان أقولك إنك وحشتني قوي والبيت من غير صوتك وهزارك بيبقى ملهوش طعم إنت السند والضهر ليا بعد ربنا “