ميساء كانت بتنهج وصدرها بيعلو ويهبط بسرعة وهي محبوسة على رجله، حاولت تدور وشها الناحية التانية علسان متبصش في عينيه بس رؤوف مسك دقنها بإيده وضغط برقة وقسوة في نفس الوقت وخلاها تبصله غصب عنها وقال:
اللي لازم تعرفيه إن مفيش ست في الكون تلمس شعرة مني طول ما أنتي في حياتي فاهمة
ميساء في اللحظة دي عينيها لمعت بالدموع من كتر الغيظ والقهر ورفعت إيدها وبدأت تضرب في صدره بضعف وهي لسه قاعدة على رجله ورؤوف سابها تطلع غلها فيه وهو بيشدد ضمتها ليه أكتر وكأنه بيثبت لنفسه وليها إنها ملكه وبس
وفجأة صوت سماعات الجناح الخاص اشتغل، وطلع صوت المضيفة وهي بتقول بنبرة رسمية :
سيداتي وسادتي نرجو منكم ربط أحزمة الأمان والالتزام بمقاعدكم.. الطائرة تمر الآن بمنطقة اضطرابات جوية شديدة مع بدء إجراءات الهبوط بمطار نيويورك.. نرجو لكم السلامة
الطيارة اتهزت هزة عنيفة جداً وكأنها وقعت بيهم لتحت فجأة ميساء اللي كان عندها فوبيا من الطيران أصلاً قلبها سقط في رجليها ومع صوت الرياح اللي كان باين في جسم الطيارة أطلقت شهقة رعب مكتومة ومن غير ما تحس ولا تفكر لفت إيديها حولين رقبة رؤوف بكل قوتها ودفنت وشها في تجويف رقبته وهي بتترعش بهستيريا ورجليها كلبشت فيه وهي قاعدة على رجله