تنزل علي درجات السلم الداخلي للقصر، سيدة في عقدها الخامس تقريبا لا يبدو عليها الكبر من يراها لا يصدق عمرها الحقيقي ، تحدد عينيها بكحل اسود ثقيل ، مرتدية عبائة مزركشة تليق بالجلوس في المنزل، شعرها الحريري معقوس علي شكل كعكة قاسية، خرج عمر من المكتب متجه الي خارج القصر ليراها وهي تنزل الدرج ،وقف اسفل الدرج يحيها منحنيا بحركة استعراضية قائلا بمرح
: واخيرا نلنا شرف رؤية زهيرة هانم في الصباح
زهيرة بشبه ابتسامة
:صباح الخير .. بابا فين
رد عليها بغيظ قائلا
: في المكتب وضرتك معاه جوه
نظرت له قائلة
: اومال انت رايح فين كده
عمر وهو يتصنع القهر
:رايح اسلم الملف ده للمحروس ابنك
لتلتمع عينيها لمعة فرح قائلة
:انت قررت تشتغل مع “قُصى” وتمسك معاه الشركات
رد عمر بتهكم
:لا طبعا ..انا رايح اخد منه فلوس بس بابا حب يخليني اعمل بالفلوس دي .
ليتصنع الحزن قائلا
: شايفة التفرقة العنصرية بيني وبين الذئردة اللي جوه؟! ..دي قبل ماتطلب الطلب بيبقي عندها
لتقول زهيرة بنبره مأنبه
:ما انت اللي بقالك سنتين مبلط مش عاوز تتخرج كان زمانك ماسك الشغل لبابا دلوقتي وكل حاجه تحت ايدك
عمر: يادي ام السنتين اللي ماسكنهوملي دول .. وبعدين انا ماليش في شغل الشركات والملفات ووجع الراس ده يا ماما
زهيرة محذرة
: ولد ..اتكلم كويس ، وبعدين ماله شغل الشركات انت عارف بابا تعب اد ايه عشان يبني الشركات دي ..وسيادتك مش عاجبك
قال عمر بضيق وكانه يروي لها قصة
: عارف ..ابتدي بشركة صغيرة واشتغل وتعب واجتهد عشان يكبرها لحد مابقت سلسلة شركات “الزيني”
ثم نظر لها قائلا
:عارف القصة دي وربنا .. وبعدين ما هو قصي اهو قايم بالواجب وزيادة والشغل نازل يرف عليه ده بابا مابيروحش الشركة دلوقتي ومعتمد عليه في كل شيء
نظرت ليه بيأس قائلة
: غبي
ابتسم عمر ابتسامة صفراء قائلا
:شكرا …انا ماشي