رواية احبك وهذا من حزن حظي الفصل السادس 6 بقلم اسما
العائله كلها مجتمعين برا سوالف وضحك بإستثناء العنود ، من يوم اللي صار بينها وبين فارس وهي تتهرب من مقابلة فارس حتى الكل لاحظوا هالشيء وظنوا انه خجل إلا فارس كان عارف سبب تهربها منه وكل مايتذكر اللي صار يبتسم ، انقضت الثلاث ايام ورجعوا كلهم لبيوتهم وكل واحد رجع لروتينه المعتاد
عائلة ابو العنود
العنود : بابا وش رايك نطلع اليوم نتعشى برا ؟
ابو العنود : من عيوني كم عنوده عندي
العنود باست خد ابوها : حبيبي يابابا ، بس ها على حسابي
ضحك ابوها : ححلو
ام العنود : الله لايحرمها منك
العنود وهي تحضن امها : ولا منك ماما
وبعد المغرب تجهزوا العائله وطلعوا كانت العنود مثل الطفله مع امها وابوها واي احد يشوفها يعرف على طول انها وحيدتهم ودلوعتهم كانت متوسطه امها وابوها ومتعلقه بذراعهم ويضحكون سوا ، والصدفه ان الجد فارس والعائله مجتمعين برا بحكم ان الجو حلو على بدايات الشتاء ولسى مابلش البرد
الجد فارس ينادي : علي
التفتوا الثلاثه .. ابو العنود : لبيييه
اشر الجد فارس له بمعنى تعال
ابو العنود : سلمي على جدك قبل نمشي
العنود : اوك
جاء عند ابوه وباس راسه .. ابو العنود : سم يبه وش بغيت ؟
الجد فارس : وينك من الصبح ياابوك ماشفتك ؟
ابو العنود : اليوم ما فضيت ابد مارجعت للبيت الا الساعه 3 منهد حيلي
ابو فارس (عبدالرحمن) : وين رايح انت واهلك ؟؟
ابو العنود : ابد عنوده عازمتنا انا وامها على العشاء
الجد فارس : يازينك ، اجل يالله توكلوا على الله اخرناكم
ابو العنود باس راس ابوه ومسك يد بنته ومشوا
راشد : الله من الدلع ماسكين يدها كنها بزر
مريم : ياحلوه عمي علي مسويها اميره
اما ام فارس كانت تحاتي ولدها كيف بيعرف لهالدلوعه ، وفارس كان بينفجر عصبيه لانها ماتسمع له ابد كعادتها الشيله على الكتف وعبايتها مفتوحه ماغير 3 او 4 ازره مسكره ماقدر يتكلم لان جده وعمامه موجودين لكن كان يتوعدها لما ترجع
العنود : استانست اليوم كثير مشكور بابا
ام العنود : اي والله استانسنا الله يعطيك الصحه والعافيه
ابو العنود : هذا واجبي اذا مااونسكم اونس من
وصلوا البيت باست العنود امها وابوها وصعدت غرفتها تتروش وبعدها تنام ، فارس كان بغرفته مترها طول بعرض وهو ينتظر وصولها طل من الشباك وشاف سيارتهم اخذ جواله واتصل عليها اكثر من 4 مرات وماردت وتوه بيرسل لها مسج جاه اتصال منها
العنود : ايوه وش بغيت
فارس : ليش مارديتي من اول ؟!
العنود : كنت اتروش وش بغيت ؟
فارس : اطلعي لي فالحديقه نفس المكان اخر مره
العنود : ليش ؟؟
فارس : تعالي وتعرفين(سد الخط بوجها ، لبست ملابسها وجففت شعرها وطلعت له)
العنود : نعم
فارس : انا مانبهت عليك بموضوع الشيله والعبايه
العنود : يوه منك ياخي ابوي وامي راضين انت وش دخلك
مسكها من ذراعها وضغط عليها بقوه : دخلني اني زوجك وكلامي يمشي عليك غصباً عنك فاهمه
العنود وهي تتألم : فاهمه فاهمه اتركني عورتني
فارس ترك ذراعها : يكون بعلمك انا كلمت ابوي وقلت له يقدم العرس ويصير الاسبوع الجاي
انصدمت العنود : لييييييش ؟؟!
فارس وهو يتكتف : عشان تعرفين بعدين كيف تعاندين فارس
العنود : لا فارس بليييز زواجنا كان بعد 7 شهور ليش تعجله ؟؟
فارس : لاني بعد اسبوعين عندي رحلة عمل 3 شهور في سنغافوره واهلي اكيد بيطلبون اخذ زوجتي معي عشان يطمنون علي
العنود : لا مو كيفك انا ماابغى ابعد عن اهلي
ضحك بإستهزاء : ماتقدرين تعترضين انتي اصلاً زوجتي شرعاً والعرس خرابيط لا اكثر
صارت تترجاه وهي تبكي : نو فارس بلييز مااقدر ابعد عن ماما وبابا بلييييز
فارس وهو معصب : لا تدلعين عندي انا مو امك ولا ابوك عشان اتحملك والعرس الاسبوع الجاي عجبك او ماعجبك(جاء بيمشي لكن مسكت ذراعه وعيونها كلها دموع)
العنود : فارس لا الله يخليك خلاص راح اسمع كلامك وانفذ كل شيء تقوله
سحب يده بقوه من يدها حتى انها طاحت على ركبها ومشى عنها وهي تبكي ، رجع لغرفته وهو معصب رمى نفسه على السرير وصوت بكي العنود وترجيها له للحين في اذنه
فارس يكلم نفسه : تستاهل انا كلمتها بالطيب ومافهمت انا ماغلطت هي دلوعه ويبغى لها إعادة تربيه(ظل طول الليل يقنع نفسه ان تصرفه صح)
ظلت تبكي طول الليل لحد ماانبح صوتها وتورمت عيونها ، ولما طلع الصبح مانزلت تفطر مع اهلها عشان لايشوفون شكلها
ابو العنود : وين عنوده ليش مانزلت تفطر ؟؟
ام العنود : طلبت من الخدامه تصحيها وقالت ان العنود سهرانه وتبغى تنام
ابو العنود : معليه اجل اول ماتصحى خليها تأكل انتي عارفه ان معها فقر دم
ام العنود : ايه اكيد بخليها تريح كم ساعه وعلى الغداء اصحيها