بيت ابو فارس (عبدالرحمن)
ما نام فارس الليل كله ، تروش وقرر اليوم عالفطور ينفذ انتقامه حتى لو كان على حساب التفرقه بين عمه وابوه ، الحقد اعماه تماماً ، اجتمعوا العائله عالفطور وكالعاده سوالف ضحك وطقطقه على بعض لكن اللي غير هالجو كله كان فارس
فارس : يبه ابغاك تخطب لي العنود
اعتلت ملامح الذهول والصدمه وجوه الكل وبالذات زياد
زياد : فارس انت مسخن ؟؟
فارس : لا مافيني الا العافيه وبكامل قواي العقليه
ريم : فروس خلك منطقي كيف تبغى ابوي يخطبها لك وانت ما اطيقها ؟!
فارس : من قال اني ما اطيقها ؟
الكل بصوت واحد : انت
فارس : ما قلت وبعدين هذي بنت عمي انا احق فيها من الغريب
ابو فارس : انا ماعندي مانع بعد صلاة الظهر اكلم عمك واشوف رده
ام فارس : بس ليش العنود ؟ بنت عمك راشد شيخه وش فيها
ابو فارس : والعنود بعد وش فيها ؟
ام فارس : البنت دلوعه مراح تسعد ولدي
فارس : لا يمه انا اعرف لها تطمني
ام فارس : بس ياولدي …
قاطعها ابو فارس : لا بس ولا شي خلينا نتوكل على الله ونخطبها
وفعلاً كلم ابو فارس اخوه وخطب العنود ، فرح كثير ابوها ورحب بفارس اما العنود الى الان ماعرفت شيء لانها كانت بغرفتها نايمه ولما صحت بعد الظهر تروشت وتوضت وصلت ورجعت نامت لحد ما يخف الاكتئاب من اللي صار لها امس وما نزلت لصاله
ابو العنود : ها انتي وش رأيك ؟
ام العنود : فارس والنعم فيه ما شاءالله كامل والكامل الله
ابو العنود : كيف بتكون ردت فعل العنود ؟؟!
ام العنود : خلها علي انا اللي بكلمها وارد لك خبر
صعدت لغرفة بنتها ولقتها نايمه خلتها لحد ما تصحى وتكلمها ، بعد آذان العصر طلعت لبنتها تصحيها ولقتها صاحيه وجالسه على اللاب توب تسولف مع نور بمكالمة فيديو
العنود : طيب نور عن اذنك انا مشغوله الحين(سكرت اللاب)
ام العنود : هذي نور ! شخبارها هي باقي بامريكا ؟؟
العنود : الحمدلله كويسه ، ايه ماما هي اساساً ساكنه مع اهلها بامريكا
ام العنود : الله يحفظها ، بعد الصلاه انزلي لصاله بكلمك بموضوع
العنود قرصهاا قلبها : ok ماما بصلي وانزل لك تحت
وبعد ما صلت نزلت لامها تحت وباست راسها
العنود : ايوه ماما وش الموضوع اللي بتكلميني فيه ؟؟!
ام العنود مسكت يد بنتها : بنتي انتي كبرتي الحين وما شاءالله صرتي عروسه
العنود توترت وخافت لا يكون اللي ببالها صح
كملت ام العنود : عمك عبدالرحمن خطبك لولده
العنود وهي تدعي من كل قلبها ما تقول اسمه : ولده من ؟؟!
ام العنود : ولده الكبير فارس
حست ان الدنيا اسودت بعيونها : ف..فارس !!
ام العنود : ايه فارس ليش متعجبه ؟
العنود : معليش ماما عطيني وقت افكر(صعدت لغرفتها)
بدلت ملابسها وطلعت وهي تحس بنيران الغضب والقهر كلها بصدرها واتجهت لفارس لقته جالس مع الشباب على الدكه نادته من بينهم
العنود بصوت عالي : فااااارس
التفتوا كلهم ومن بينهم فارس..ابتسم : عن اذنكم خطيبتي تناديني
انقهرت زود من كلمته ، وصل عندها مسكها من يدها واخذها بعيد عنهم
دزها وصارت قباله : نعم وش فيك تصارخين انهبلتي ؟؟!
العنود : نعامه ترفسك يارب انت مريض عقلك فيه شيء ؟!
فارس : لا بسم الله علي هذاني قدامك مافيني الا العافيه
العنود : اجل ليش خاطبني مو توك امس مسمعني كل الإهانات فالدنيا وش تبغى فيني اتركني بحالي
فارس ببرود : مدري بس فجاءه حبيتك قلت خلني اتزوجك
العنود : فارس لا تستهبل هذا زواج مو لعب ، وبعدين انا اكرهك ما احبك ما احب حتى شوفتك
مسكها من شعرها وقربها له : يعني انا اللي ميت عليك ، انا بربيك والدلع هذا كله بطلعه من خشمك اوريك يالدلوعه كيف تمدين يدك على فارس
العنود وهي تتألم : وانت على بالك انا بوافق ، انت حثاله مراح اسمح ابد اسمي يرتبط بأسمك القذر
شد شعرها اكثر لدرجة ان عيونها دمعت : بتوافقين غصب عنك انتي ماشفتي فرحة عمي لما خطبتك(ضحك بإستهزاء) : قلبه حاس انك بطيحين بكبده لو ماجيت انا
ضربته العنود بقوة على بطنه ولما هد شعرها انحاشت بسرعه وتركته وراها متألم من ضربتها ويتوعدها ، اتجهت لغرفة امها وابوها وهي ناويه تقول لهم قرارها لكن اللي سمعته خلاها تتجمد عند الباب
ابو العنود : الحمدلله فارس ولدنا ونعرفه زين وما اظن العنود تنضام عنده
ام العنود : اي والله حتى انا مرتاحه ناحيته والفرحه ماهي سايعتني
كانت العنود تسمعهم وقلبها يتقطع على امها وابوها ، صعدت غرفتها وحضنت المخده وهي تفكر ودموعها غرقت خدها ، امها وابوها ما عمرهم زعلوها او كسروا بخاطرها تحدوا الكل وتركوها تدرس برا تحملوا الغربه 5 سنين بعيد عن اهلهم عشانها ضحوا كثير عشان سعادتها وهي مو قادره تضحي عشان سعادتهم ، مسحت العنود دموعها وقررت انها راح تقبل بفارس وهي اللي راح تكسر غروره بدل لا هو اللي يكسر غرورها