ارض الوطن
بيت عائله ام فهد (وداد)
ناصر : امون شخبار عنوده اتصلت عليك ؟
اماني ارتبكت : ها ايه ايه الحمدلله بخير
ام فهد : ليه مااتصلت علي ماهو من عوايدها ؟!!
اماني : ماتدرين يمه يمكن انشغلت
ناصر : ايه ماشاءالله انشغلت بالطلعات (اماني ماكانت منتبهه لهم كانت خايفه على العنود)
بيت ابو فارس (عبدالرحمن)
ام فارس : طمني عنك يمه شخبارك وشخبار مرتك عساها ما اذتك
فارس بداخله (إلا ذبحتني يمه) : الحمدلله يمه كلنا بخير
ام فارس : الحمدلله الله يهنيك ياولدي ويحفظك
فارس بداخله (اي هنا يمه انا جسم بدون روح) : آمين ويحفظك يالغاليه
بيت عائله ام فهد (وداد)
اماني حزمت الامر وقررت تروح لبيت خالتها تسلم عليها ومن هناك تجيب رقم فارس وتطمن على العنود بأي طريقه كانت
طقت باب غرفة فهد : ادخلي
اماني : مرحبا فهود
فهد : مراحب
اماني : فهود ماعليك امر ممكن توديني لبيت خالتي ساره
فهد : ليش ؟!
اماني : ابد اشتقت لها وقلت ازورها ومره وحده املا الفراغ بعد العنود
فهد ابتسم على حنان اخته : من عيوني عطيني دقائق بس
وبعد دقائق مشوا لبيت خالتهم ام العنود ، جلست معها سوالف وضحك لكن ماتجرأت تطلبها رقم فارس خافت ان خالتها تقلق او تفهم غلط ، طلعت للحديقه تخفف من توترها وقلقها وهناك لقت الحل
(صادفت زياد طالع من البيت ونادته)
اماني : زياد
التفت لها واستغرب : هلا اماني كيفك ؟
اماني : الحمدلله انا بخير (كملت بخجل) : ل لو سمحت ودي بخدمه منك
زياد : امري
اماني : بصراحه انا قلقانه على العنود صار لها اكثر من اسبوع ما اتصلت وهذي مو عادتها ولما اتصل عليها جوالها مغلق فكرت لو تعطيني رقم فارس عشان اتطمن عليها
زياد ابتسم على خجلها : ايه ابشري خذي سجلي عندك
بعد ما سجلت الرقم ناظرته : شكراً
زياد : عفواً وطمنيني بعدين عنها لان حتى فارس ماهو على بعضه
خافت اكثر : الله يستر عليهم
رجعت لداخل بيت خالتها وزياد يتابعها بنظراته ، لكن بدأ القلق يسري بقلبه على اخوه وبنت عمه