بيت ابو العنود (علي)
ام العنود وهي تبكي : والله قلبي معورني على بنتي 3 شهور مو شوي
ابو العنود : تعوذي من ابليس العنود ماهي لحالها زوجها معها
ام العنود : قلبي ماهو مرتاح ابد ، خلنا نسافر معهم
ابو العنود : انتي بعقلك عرسان توهم وتبين نروح معهم
في الفندق
صحت العنود قبل فارس وتروشت وبدلت ملابسها وطلبت الفطور وبعدها راحت لفارس تصحيه لقته يتروش ، رجعت لصاله تتابع التلفزيون على مايوصل الفطور
فارس وهو لابس الروب : متى صحيتي انتي ؟
ردت بدون لاتناظره : من بدري وطلبت الفطور (رن جرس الباب) : قوم جيب الفطور
راح للباب وهو وده يذبحها دخل القرسون ومعه طاوله مليانه اكل اخذها فارس منه عند مدخل الجناح ودفها لداخل : رتبي الصحون على الطاوله لحد ما البس واجي
كان ودها تطنشه لكن خافت يضربها ، قامت عن الكنبه ورتبت الفطور على الطاوله وكلها دقائق وطلع فارس بعد ما لبس
فارس : بعد الفطور بنمشي نسلم على اهلنا ونصلي الظهر وبعدها نروح المطار
العنود : بنسافر اليوم ؟؟!!!
فارس : ايه اليوم
العنود : اجل بسرعه خلنا نرجع مارتبت شنطتي
فارس : عطيتك خبر من زمان يالدلوعه
العنود : على بالي بعد العرس باسبوع السفر (فطروا بسرعه وتجهزوا ومشوا)
بيت ابو ماجد (محمد)
ام ماجد : يعني بيسافرون اليوم ؟!
عزام : ايه يمه طيارتهم العصر
ابو ماجد : انت بتوصله ؟
عزام : لا فارس رفض بس بجي مع ماجد وخلود عشان نرجع سيارته معنا
ماجد : ومره وحده نسلم عليه وعلى العنود قبل يسافرون
ابو ماجد : ابوي بيروح معكم ؟
خالد : لا يبه بيروح مع فروس ولد عمي راشد