فـ أظهر “رستم” امتعاضه من تصرف “ظافر” و :
– ينفع اللي صاحبك عمله ده!! أبعت البنت تعمل شغل يقوم مبهدلها كده؟
ذمّ “مروان” شفتيه بعدم رضا و :
– لأ طبعًا، أنا فهمته إن ده مضر لسمعتها.. مينفعش التمادي ده حتى لو كان لصالحها، يعني إيه يقول إنها خطيبته لمجرد حمايتها و……
توقف “مروان” عن السرد عندما لاحظ تغير ملامح “رستم”، يبدو إنه لم يكن يعلم بهذه الحادثة وإلا ما اعتراه كل هذا الإندهاش.. حمحم “مروان” و :
– آه.. أقصد يعني آ….
– أنت قولت اللي المفروض يتقال
ثم ابتسم و :
– طالما ظافر قرر يكمل الكذبة، يبقى يتحمل تبعات اللي عمله
توجس “مروان” من تحقيق ما يفكر به و :
– يعني إيه ؟
فأجاب “رستم” بدبلوماسية شديدة :
– ولا حاجه، هيبقى راجل ويقف ورا كلمته
ازدرد “مروان” ريقه و :
– آه!!
– المهم، انت كنت عايزني في موضوع مهم؟
زفر “مروان” بقلق وهو يقول :
– بصراحة ياعمي أنا كنت جايلك في موضوع مهم، على ما يبدو هيبقى عندنا فرحين مش فرح واحد
وكأن “رستم” استنبط ما يرغب في البوح به ولكن أخفى ذلك :
– قصدك إيه؟؟
استجمع شجاعته وقال دفعة واحدة :
– أنا عايز أطلب منك إيد تمارا، هكون أسعد إنسان في الدنيا و……..
لم يكمل “مروان” حتى عبارته، ليجد “رستم” يقاطعه وهو يصافحه بحرارة :
– وانا موافق، ألف ألف مبروك يامروان يابني