رواية ابن رستم الفصل الثالث عشر 13 بقلم ياسمين عادل – للقراءة المباشرة والتحميل pdf

فـ استنكر سؤالها قائلًا :
– أمال هتقومي تهزي جسمك مع الـ ××××× دول مثلًا!!

كانت تهز قدميها بتوتر وهي تتحدث إليه وبعصبية مفرطة :
– طب عايزين نرقص، نعمل أي حاجه
– معنديش مشكلة، قوموا أوصلكم الفندق وارقصي في أوضتك للصبح.. إنما هنا كل حاجه على مزاجي أنا، مفيش حركة من هنا

فـ صاحب فجأة :
– يـــــوه

ضغط “مروان” على ركبتها فجأة ونظراته المحذرة قد طافت على سطح بؤبؤيه :
– كفاية ياتمارا، أنا مش صبور زي أخوكي! يعني بـ اختصار مش عايز أقلب عليكي

فـ استهانت به وهي تصيح متعمدة أثارة غيظه :
– يعني إيه يعني؟ هتعمل إيه!!

فـ صاح وقد بدأ بالفعل يغضب :
– هكسر رجلك عشان تقضي باقي الأجازة في مستشفى الغردقة العام.. قـومي

ونهض فجأة وهو يشير إليها :
– مفيش قاعدة أكتر من كده، شطبنا خلاص

أدركت “فدوى” أن “تمارا” قد تدللت للحد الزائد الذي أخرج شخصية أخرى تجلّت على وجه “مروان”.. فـ اقتربت منها لتهمس :
– خلينا نمشي عشان لو قولتي كلمة كمان احتمال مروان يكسر رقبتي أنا كمان.. نلمها أحسن هه

وقفت “تمارا” وقد خشيت تطور الأمر حقًا، وسارت أمامه بخطى شبه متعثرة حتى وصلن لسيارته.. ظهر انفعاله في قيادته التي كانت سريعة للغاية، حتى إنها كانت تنظر للطريق بتخوف ثم تنظر لوجهه العابس.. حقًا استطاعت إخراجه عن طوره وبشكل لم تكن تتمناه.. توقف فجأة أمام مدخل الفندق، ثم قال بـ اقتضاب :
– أنزلوا