_اه عاجبنى برودتها، انتِ مش فاهمة حاجة، انتِ هتسيبى ورا ضهرك عز يتمناه اى حد فى مصر، كل إللى هناك يتمنو نص إللى انتِ فيه، يتمنو العيشة دى، والنضافة والحرية دى، يتمنو الراحة والفلوس وراحة البال، الحرية هنا ملهاش مثيل
ثم رفع إصبعه وهو يكمل:
_هنا مفيش حد يقدر يدوسلك على طرف، واذا كان الدفا إللى انتى هتتكلمى عليه دة ناتج عن شيء فهو من الناس إللى نايمة فوق بعض من الزحمة
صمت يهز راسه وهو يكمل بضيق:
_هناك عنين بتنهشك وانتى ماشية، تَدَخّل فى حريتك وخصوصيتك، مقتنعين انك مادام من اهلهم يبقى لازم يعرفو كل حاجة عنك
اعادت لوجين غرتها الذهبية للخلف ثم نظرت له لتقول بعتاب:
_حتى لو كان الدفا دة من الزحمة وفيه تطفل، بس فى الاول والاخر الواحد لاقى حد يسأل عنه، حد يهتم بيه، لاقى ناس حواليك، ناس من لحمك ودمك، ناس مهتمة بيك يا بابتى.
ان وقعت واثق ان مليون واحد يجرى عليك حتى لو ميعرفوش انت مين
صمتت تشير حولها وهى تكمل بضيق:
_ مش هنا!! كل إللى بيشوفك فى مشكلة بيقول مليش دعوة، التطفل دة بهدف الحب والاهتمام،
وفوق ده كله فيه ناس من اصلك، من نفس ثقافتك وتفكيرك وعقليتك ودينك مش حاسس انك نغمة ساذة فى وسط الكل ومحدش فاهمك!! مش فاهمة ازاى انت رافض رجوعنا بعد كل اللى بقوله