رواية أحلام فتاة شرقية كامله وحصريه بقلم ماريان بطرس – للقراءة المباشرة والتحميل pdf

هتف وليد بحنق بما جمد اوصالها واوجعها حد الجحيم:

_عايزة تعرفى فيه ايه؟؟ فيه أن انا زهقت، وزهقت اوى كمان، كل شوية تأجيل تأجيل لما خلاص الواحد طهق.
عارفين انكم ناس على أد حالكم، بس مش بالطريقة يعنى إللى تخليكم مش قادرين تجهزو بنتكم بالطريقة دى، مش اختراع هو، اومال لو كنا قولنالكم حاجات أكبر كنتو عملتو ايه؟؟

وبعدين تعالى هنا انتِ يعنى بتعملى ايه؟؟ انتِ بتشتغلى، وباباكى كمان ومش قادرين تجهزو!!

ثم ابتسم ساخرا:

_ قولتلك ميت مرة سيبى الشغل إللى ملوش لازمة دة، بتقبضى منه كام يعنى؟ كلام فاضى والاسم شهادة جامعية ومش عارف ايه وشغلك كله مش بياكل عيش، يعنى ايه يعنى مهندسة ديكور مسارح!! كلام فاضى

هتفت به بغضب وهى تدافع عن ذاتها وكينونتها وعملها الذى تعشقه:

_ أنا مهندسة ديكور مواقع تصوير وحفلات، يعنى شغلى مهم جدا فى الافلام وا…

قاطعها وهو ليرفع يده فى وجهها قائلا بسخرية:

_ بس بس متتحمقيش اوى كدة، مواقع تصوير ايه وكلام فاضى ايه، حوشى حوشى المواقع إللى نازلة ترف علينا، يا بنت دة انتِ محدش يعرفك اصلًا، ما تتنرفزيش اوى كدة، مين بيسيب المعروفين ويختارك انتِ فى السينما ولا غيره؟ انتِ اخرك إللى بتعمليه، تعملى ديكور مسارح بتاع حفلات الأطفال، ونهار ما تترفعى خالص بيبقى حفلات تخرج جامعية، لكن سينما ومسرح ومواقع تصوير لا مش لونك خلاص.