_مش مهم المكان، المهم الشخص اللى انتِ معاه
نظرت له بتساؤل قائلة بتعجب:
_ماله الشخص يا وليد؟ انا مش فاهمة تقصد ايه؟؟!!
نظر لها ثم حول انظاره للمكان مرة ثانية متشدقًا بضيق:
_مفيش يا سابين، خلينا نمشى احسن
مطت شفتيها بجهل مجيبة بلا مبالاة من تصرفاته الغريبة اليوم:
_براحتك، اللى انت عاوزه
ابتسم بتهكم وقال وكأنه مُصِّر على جلدها بكلماته:
_ما هو براحتى فعلًا، من امتى وانتى ليكِ رأى؟
نظرت له بضيق ثم قالت بنبرة مترددة:
_فيه ايه يا وليد مالك؟ انت مال كلامك كله الغاز كدة ليه؟؟؟
نظر لها بضيق ليجيبها باقتضاب:
_ مفيش يا سابين، وخلينا نمشى بقى علشان مزعلكيش احسن.
نظرت له بضيق ثم تحدثت بصرامة مستحدثة عليها معه:
_ لا يا وليد، مش متحركة من هنا غير لما اعرف فيه ايه ومال طريقة كلامك كدة، انت كلامك مش عاجبنى ومليان تجريح.
نظر لها ثم قال بملل:
_ يلا يا سابين نمشى علشان لو اتكلمنا هنتخانق
الان فقط تصلب رأسها بعناد، تريد ان تعلم ماذا به، وماذا فعلت له حتى يعاملها هكذا.
حسنًا الان تريد سماعه ومعرفة ماذا به، لذا هتفت قائلة بعناد وانفعال وهى تشيح بيديها امامه بغيظ:
_ لا يا وليد مش متحركة غير لما اعرف فيه ايه، انا مش لعبة فى ايدك، وكمان انا ليا رأى، ورأيى انى هقعد واسمعك
ودلوقتى وقولى… فيه ايه؟؟