صمت ليقترب منها قائلا بقوة وكبرياء:
_انتِ مش ناقصة حاجة علشان تستنى حد تعتمدى عليه، انتِ مش ضعيفة، الحب والجواز اختيار، انك تختارى على الفرازة وتنقي اللى يفهمك ويحبك ويحس بيكِ، إللى ميفهمكيش بلاش منه، إللى يبصلك انك إنجليزية او انك مصرية ومش فاهم مشاعرك أو توترك يغور، فاهمانى؟
إللى يتجوزك لازم يتجوزك وهو مقتنع بيكِ عاشقك وواثق فيكِ، مامتك كانت واثقة ان باباكى هو امانها وانه مش باصص لاختلاف ثقافات او بلاد او لغات، وكذلك هى متغيرتش علشانه بس احترمت ثقافته، احترمت أسلوب حياته، وكذلك هو احترمها.
اى علاقة لازم تكون مبنية على الاحترام والثقة، لازم تكون مبنية على اختيار كامل واقتناع تام والا هتبقى علاقة فاشلة.
ثم نظر فى عينيه يكمل بتعقل حانى:
_ متزعليش على الحب والجواز يا لوجين لان لسة ما جاش البنى آدم إللى بيكملك.
قال كلماته الأخيرة متحركا صوب سيارته بينما وقفت هى تنظر لاثره بذهول مصدوم وهى لا تستوعب فى هذه اللحظة بأن من كان يحدثها للتو هو مروان ذاته
_________________
تحرك يدخل لغرفته بغضب، من بعد حديثه معها وهو يشعر بنار تتلظى بمعدته، يشعر بغضب يحرق احشائه وهو يتذكر تلك النظرة الكارهة منها جهته والاشمئزاز الواضح بعينيها تجاهه.