صمتت تقضم شفتيها وهي لا تعلم كيف تصوغ الكلام لتبتسم وقتها سابين بتعجب هامسة بذهول:
_عايزة تآمنى بأسرارك لغريبة لسة عارفاها!!
وفى المقابل هزت ريم كتفيها تجيبها بابتسامة خجولة:
_بس ارتحتلها ومظنش فيه مانع
ارتفع حاجب سابين جهتها تجيبها بمرح:
_ريم هانم، انا من المنطقة الشعبية اللى لسة سايباها، يعنى اكيد عارفة الفرق بينا من المستوى المادى والاجتماعى
ثم اشارت جهة ملابس الاخرى تكمل بسخرية:
_بصي لهدومك وبصى للمكان اللى انا عايشة فيه وانتِ تعرفي الفرق بينا، فرق السما عن الارض
تعالت ضحكات ريم الناعمة فى المقابل لتجيبها بمرح:
_سابين، انا مش هتجوزك علشان اهتم بمستواكِ، انا بس عايزة اتكلم معاكِ
ثم تلاعبت بعدها بحاجبيها بشقاوة وهي تقول بمرح ناعم:
_انتِ بنت مفتحة لكن انا قطة مغمضة محتاجة واحدة زيك تفتحنى وتقف معايا وتعرفنى اجيب حقى ازاى
وفى المقابل ضحكت سابين وهي تجيبها بمرح:
_بودي جارد يعنى؟
هزت ريم رأسها بابتسامة لتجيبها بعدها بشرود:
_سميها زي ما تسميها بس انا واحدة مامتها ماتت وملهاش غير والدها، واكيد هي مش هتحكيله كل حاجة، فمحتاجة حد اتكلم معاه
ظلت سابين تنظر جهتها بابتسامة هادئة وهي تلحظ رقتها ونعومتها وبساطتها بل وتمسكها بها لتومئ برأسها تعطيها الرقم ولم تكن تظن ان الفتاة بالفعل ستتصل بها مرة اخرى ومن بعدها توطدت علاقتهم لدرجة ان اصبحت اقرب صديقة لها.