_هو حضرتك عاوزة منى ايه؟ أو بمعنى أدق عاوزة توصلي معايا لايه سواء بوجودك فى مكتبى أو بكلامك المتوارى معايا؟
حضرتك لو بتفتشى ورايا وبتدورى إن كنت عملت مشكلة او حاجة فاحب اطمن حضرتك إنى لسة ملحقتش اعمل حاجة لإنى لسة مستلم الشغل من إسبوع، يعنى نقدر نقول متدرب
صمت ليرفع عيونه جهتها ليلاحظ المكر يتلاعب بحدقتيها ليتنهد وقتها بتعب وهو يكمل بهدوء ضائق:
_وإن كنتِ حضرتك مش طايقة وجودى بعد آخر موقف حصل بينا فعقابا ليا حابة تحطيلى حاجة أو تحطينى فى مشكلة مش قادر اوصلها فمن الأسهل بدل ده كله إن حضرتك ترفضي وجودي، وأنا عندى استعداد امشى من غير مشاكل او افتح بوقى، لكن شغل القط والفار ده مش هينفع.
صمت ليتلاعب فى خصلاته السوداء وهو يكمل بهدوء:
_على الاقل علشان ميحصلش توتر فى علاقة بابايا وباباكي بسبب شغل اطفال، وندمر صداقة بقالها سنين
ثم رفع عيونه جهتها يكمل بهدوء ممزوج بتعقل:
_وإن كان هزارى ضايقك اوي كدة فاعرفي إنى مكنتش اقصد، أنا شخص مرح بطبعي ومتعود على كدة مع أصحابى ومش بس اهلى لكن انا فى مصر بهزر حتى مع طوب الارض ودى طبيعتنا هناك ومع ذلك ان كنت ضايقتك
قطع كلماته ينظر جهتها يكمل بهدوء:
_أنا آسف فعلًا
ولكن ولصدمته كانت إجابتها أغرب إجابة يحصل عليها، حيث تعالت ضحكاتها المرحة تملئ أرجاء الغرفة، ليقطب وقتها حاجبيه ينظر جهتها بذهول مصدوم وهو لا يستوعب سبب ضحكاتها هذه.