_لا مش ممنوع، بس نقدر نقول إنها غريبة شوية
نظرت له لوجين بمكر وقد التمعت الشقاوة بعينيها وهى تسأله بخبث قبض قلبه:
_غريبة ليه؟ لأنه مش مكتبى؟ او بالأصح نقول لأنه مش مكتب بابا وأنا اتطفلت عليه؟
وعلى غير المتوقع فهو لم يتوتر من مكرها إنما رسم ابتسامة لطيفة على وجهه وهو يجيبها بلباقة:
_ازاى مش مكتبك يا لوجين هانم؟ دى مكاتب الشركة كلها بتاعت حضرتك، وحق حضرتك تدخلى مكان ما تحبي
ابتسامة خفيفة بالكاد تُرى ارتسمت على شفتيها من إجابته الدبلوماسية جهتها، ولكنها مع ذلك لم تستسلم إنما رفعت حاجبها المُنمق تجيبه بمكر:
_ بس هيفضل ده مش مكتبى ولا ايه؟ واظن ده رأيك وفكرتك عنى؛ إنى بنى آدمة مُستفزة ومعنديش أى احترام لخصوصية اللى قدامى، بالأخص وأنا بقعد فى مكتب صاحبه مش موجود.
اغمض مروان عينيه متنهدًا بتعب من حديثها هذا وقد كان قد سأم بالفعل من لعبة القط والفأر هذه على الصباح، لذا تحرك يقترب منها عدة خطوات دون أن يتعدى المسافة المقبولة بينهم، ليعقد بعدها يديه أمام صدره يجيبها بصوته الرخيم محافظًا على إسلوبه الهادئ المتحضر وإن كان اكتنفه بعض الضيق الخفيف:
_ آنسة لوجين، ممكن اسأل حضرتك سؤال؟
وابتسامتها الماكرة وهى تنظر جهته متكئة بظهرها على ظهر مقعده أعلمته إنها تعطيه الإذن بالحديث، لذا نظر أرضًا محاولًا تهدئة ذاته ليرفع بعدها عينيه جهتها يسألها بهدوء متعجب: