لعبها صح يا سامح لما لعب عليا دور الشاب المحترم المحتاج مساعدة، انه مجتهد وعاوز ينجح بس فهمه على اده، وانه عاوز ينجح علشان يفوز باحترام اهله إللى دايما شايفين فاشل وعاوز يثبت أنه مش لازم يكون فى مجال تجارى علشان يكون ناجح. انه عاوز يشق طريقه باسلوبه الخاص ويكون ليه نجاحه الخاص.
وانا كنت ساذجة اوى يا سامح وصدقته، سرق قلبى وبعد ما اخده رماهولى على الأرض وكإنه حتة خردة وهو بيقولى انى اقل من توقعاته، وان مش طارق العزاوي إللى يحب واحدة زيى، دة ان مكانتش برنسيس متنفعش .
طلعنى لسابع سما وبعدها حدفنى لسابع ارض، قالى مش حتة دودة كتب هى إللى تلفت انتباهه دة انا بالنسباله مش أنثى اصلًا، انا ايه إللى بملكه علشان افوز بقلبه؟ علشان افوز بأمير لازم اكون أميرة.
سندريلا كانت جميلة جدا علشان كدة الأمير دور عليها فى كل مكان، سنوايت كانت بارعة الجمال لدرجة مرات ابوها كانت عاوزة تقتلها، حتى جولييت جمالها سرق قلب روميو لدرجة اتحدى عيلته وعيلتها وعاداتهم وحريتهم وعداوتهم عشانها.
وانا الأول لازم يكون عندى صفات اميرات الروايات علشان يكون عندى حب زى الروايات، مين هيتحدى العالم كله وحتى نفسه علشان خاطر بنت عادية بل اقل من عادية!! وبعدين انا ناسية انا مين وهو مين! انا ببص لفوق اوى، دمرنى يا سامح دمرنى