_ شروق عبد الله همام، حتى بنت مالهاش لقب كبير زيهم، بنت من عيلة متوسطة بل اقل، يعنى هتفكر مليون مرة قبل ما ترتبط او تحب، بنت بعقلية قديمة بتفكر فى ان البنت ما ينفعش ترتبط أو تحب غير إللى هيكون زوجها، دودة كتب ماتشوفهاش الا وهى بتقرا سواء كتب أو جرايد، ماتلاقيهاش غير فى كافيه الجامعة بتقرا او فى المكتبة ودايما ماشية بكتبها.
بنت عايشة فى زمن الحب القديم، من النوع إللى بيحب عبد الحليم وشادية وام كلثوم، بنت مابتملكش اى من سمات الانوثة، لا شعر ملون ولا عيون ملونة ولا جسد انثوى بحت، مجرد بنت عايشة وسط صفحات الكتب، بنت من أوائل الدفعة غير مهتمة بالمظاهر ابدا، بنت أنطوائية مهتمة بالعلم والثقافة فهيكون من الصعب الضحك عليها وهيتعب ويخطط كتير جدا.
ثم رفعت عيونها جهة شقيقها بعيون مليئة بالدموع وهى تكمل بحرقة:
_بس هو نسي حاجة مهمة، انها مهما كانت فهى بنت، بنت عاوزة تحب واحيانا نفسها حد يعشقها بكل ذرة فى كيانه مش مجرد كلام، بنت بتدور على امير أحلام يحيى كل ذرة فيها مش مجرد قاتل مدمر، بتدور على بطل الروايات الخاصة بس اكتشفت انها عشقت شرير روايتها، سرق منها اول كل حاجة كانت بتتمنى تديها لصاحبها الحقيقي، اول دقة قلب، اول ضحكة لشاب، اول خجل من اول كلمة حلوة تسمعها، اول ابتسامة، اول كلمة حب.