_ سؤال واحد، هو انتِ مريضة ؟؟ عندك عقدة نفسية ونفسك تتهانى وفرحانة بهيئتك المظلومة والمشوهة دى!! فرحانة بأن الناس تدخل تشوفك بالمنظر المُهين دة وانتى مرمية على الأرض سايحة فى دمك وهدومك مقطعة؟؟
اذا كنت بشعر بالقرف والغضب والذل والاهانة لرجولتى اللى بتسكت عن حاجة زى دى لكن فى النهاية لما ببصلك واشوف صمتك اقول مليش دعوة، خلينى بعيد اذا كانت هى راضية.
احتدت بعدها عينيه البندقية واحترقت بنيران غضبه لينفضها من يده كإنها وباء وهو يهتف بها باشمئزاز:
_ لكن يوصل جنانك ومرضك انك تقتلى ابنك يبقى ايه؟؟
صرخت سهيلة وقتها به وهى تدافع عن منطق ليس له وجود:
_الإجهاض مش قتل، ده لسة مدبش فيه الروح لسة حتى ما اتشكلش.
انتفض يمسكها من مرفقها مرة اخرى بقوة وهو يهزها بغضب وقد تخلى فى هوجة غضبه عن رقيه وتحضره الذى طالما اتصغ به ليهدر بجنون:
_حتة اللحمة دى هتكون انسان ربنا شاء وقدر وحطها فى بطنك، حتة اللحمة دى بتتغذى منك دلوقتى يعنى كائن حي عايش.
الاجهاض ما هو الا كلمة افضل تشكيلا لكن الحقيقة انها جريمة قتل لطفل برئ كل ذنبه انه جه فى الحياة لقاكى امه زى ما لقى الحيوان التانى ابوه.
صرخت به دون أن تأبه لالم ذراعها الذى لم يخفف يده عنه بل يزداد ضغطا كلما تضايق واغتاظ: