_سابين يا حبيبتى خدتى بالك انا قولت ايه لما طارق عمل إللى عمله؟ انا ضربته وهزأته، مش انا إللى اعيش مقهورة على انسان بيأذينى، مش انا إللى اهتم بكلام الناس.
الناس كدة كدة هتتكلم ومش عاجبهم حد، وظيفة الناس هنا الكلام وبس لكن مفيش حد منهم هيعيش معاكِ ولا حد فيهم بيشيل الأذى عنك، فان كنتِ باقيه على علاقة علشان كلام الناس يبقى بلاش منها العلاقة دى لان الناس مش هينفعوكِ، فعيشي بكرامتك يا سابين واللى يدوس عليها دوسى انتِ عليه، لان اهم حاجة كرامتك
ثم نظرت داخل عينيها قائلة بقوة:
_انتِ بتعيشى عمرك مرة واحدة فاعملى إللى يريحك، محدش بييجى يعيشلك حياتك، ومفيش آلة بتيجى ترجع الزمن، افتكرى دة كويس فاعملى إللى يريحك ويسعدك وبس علشان متجيش فى يوم وتقولى ياريت كنت عملت.
وبعدين عمى ومرات عمى عاشو حياتهم وعملو إللى مقتنعين بيه، يبقى انتِ كمان إللى مش مريحك بلاش منه، إللى بيأذيكى ابعديه عنك، احسنلك تعيشى مرة بدون قيود بدال تعيشى متقيدة طول حياتك بوجع والم.
ثم ابتسمت قائلة بنعومة:
_انا بعترف أن الجواز نص الدين وجزء مهم من الحياة بس مش هو الحياة كلها، الاهم انك تحسى انك راضية عن نفسك وتبنى ذاتك علشان متكونيش فى يوم معتمدة على حد، ومايجيش واحد يذلك كونى قوية، فاهمانى؟