ثم اكمل بسخرية قاتلة:
_وبعدين هيأذيكى فى ايه؟ عريس كامل مكمل معاه كليه وهيعيشك فى شقة لوحدك فى حته نضيفة، وبيكسب كويس، وشكله مش وحش ولا أقرع ولا بكرش زى ما انتو بتتمنو، لازمها ايه التفاهة دى؟ وفوق كدة دخل البيت من بابه
صرخت به وقتها بإنهيار:
_ دة واحد معقد دخل البيت علشان يهين أصحابه
اشاح بيده مجيبا ببرود:
_انا معنديش استعداد اطفشه خصوصا ان الجهاز كله عليه، انتِ مش عليكِ غير تجيبى هدمتك ومواعين المطبخ، يعنى ريحنى الراجل
ثم خرج وهو يغمغم:
_ يقطع البنات وخلفتها، ملقتش غير البنات وتديهانى ياربى؟ كنت تدينى ولد يسند ضهرى
بكت وقتها سابين وهى تضع يديها على وجهها حينما استشعرت الخزلان من اقرب الناس اليها بينما لكزتها والدتها قائلة بغضب:
_ انتِ اتجنيتى يا بت، عاوزة تفكى خطوبتك؟؟
رفعت انظار معاتبة ومنكسرة لوالدتها وهى تجيبها بقهر:
_حتى انتِ يا ماما رافضة كلامى؟؟
زجرتها انهار بغلظة:
_ايوة ازعقلك واكسرلك رقبتك كمان، ايه عاوزة تعنسى وتقعدى فى ارابيزى العمر كله وتشمتى فيا الناس والجيران ويقولوا ان بنتى معيوبه؟
ثم مصمصت شفتيها وهى تكمل بغيظ ممزوج بقهر:
_ ولا عايزة مرات عمك تشمت فيا وتقول ان ابنها اتجوز وانتِ لا، وان انتِ معيوبة علشان كدة ما اخدتكيش