لطمت خديها بصدمة دون شعور منها وهى تصرخ ببكاء مصدوم من اجابة والدها اللا مبالية:
_وهو انا هستنى لما يضربنى؟
تنهد وقتها والدها بغيظ من تصرفات ابنته الطفولية وعدم تحملها لكلمة، يعلمها اكثر من الجميع كم هى عنيدة وصعبة المراس، وكم هو اسلوبها عنيف ومتحدي، تتحدى الجميع بلا مبالاة وتساوى رأسها بالجميع
ولكنه لم يكن وقتها يعلم ان ابنته قد تدمرت ثقتها بذاتها من مخطوبها ولم تعد لديها صفة واحدة من صفاتها التى تقلقه والتى كانت تعتد بها
زجرها وقتها حليم بنظره ثم صرخ وقتها بغيظ:
_بت اتلمى كدة واعقلى، وبعدين اهى كلمة ومش هتتكرر، وانا هكلمه ومش هيعمل كدة تانى
اتسعت عينى سابين بصدمة من اجابة والدها اللا مبالية لتتعالى وقتها شهقات بكاءها وهى تجيبه بقهر:
_يعنى كمان هتقل كرامتى قدامه؟ مش كفاية انك مطنش وناسى كرامتى لا كمان عاوز تعرفه انك عارف ومعملتش حاجة ولا هامك الموضوع؟ ليه مصر تستقل بيا كدة؟ ليه مصر متخليش ليا قيمة قدامه؟ انتو ماسكين فيه ليه وعايزين تجوزونى ليه؟
صرخ بها باندفاع وكلمات كانت كالسياط تحرق قلبها قائلا:
_وليه لا؟ مش ده العريس الوحيد إللى جالك؟ مش كفاية انك وصلتى لنص العشرين ومفيش واحد بص فى خلقتك ومخللة جنبى!!