_علشان كدة بلاش يا ريم، بلاش تبقى متاحة اوى كدة، ابعدى يا ريم، اديله فرصة يفهم مشاعره ويسعدك.
خلى ليكِ شخصية معاه وبلاش انت إللى تجرى وراه دايمًا، خليه هو إللى يجرى وراكِ شوية، خليه يحس انك ممكن تضيعي من ايده لو متعبش علشانك واهتم، خليه يحس بقيمتك وانك انسانة مش شيء موجود في البيت ومتواجد معاه دايمًا مهما عمل ومهما بعد هيرجع يلاقيه بنفس العطاء.
التمعت عيني ريم بالدموع وابتلعت تلك الغصة المسننة العالقة بحلقها لترفع بعدها عيون كسيرة جهتها تواجهها باكبر مخاوفها:
_وأفرض مجاش
ترقرقت الدموع بعيني سابين شفقة وألم على حال صديقتها وهي تعلم بكل الالم العاصف بكيانها وخوفها من الفقد ولكنها مع ذلك مالت برأسها للجانب لتنظر لملامحها بوضوح اكبر وهي تجيبها بصوت متحشرج من انحباس البكاء بحلقها على ذاتها وعليها:
_من واقع تجربتى إللى مريت بيها هقولك انه لو مجاش يبقى هو من الأساس مش عاوزك يا ريم، فهل انتِ عاوزة تفضلى مع واحد مش عاوزك؟؟
صمتت لتكمل بشفقة:
_انتِ مش قليلة يا ريم، انتِ بتملكى كل حاجة مال، جمال، رقة، ارستقراطية، ومكانة اجتماعية، ونعومة ملهاش مثيل.
علشان كدة اهتمي بنفسك وابني كيانك الخاص بدون اهتمام انك تكوني تابع لحد او انك تدورى على وجودك في حياته.