تنهد وهو يستمع لصوت شقيقه وهو يقول بمرح:
_عارف يا انس، فيه صديقة لندى قابلتها، بنت لطيفة جدا ومرحة و…
اوقفته انس يجيبه بهدوء ملول:
_شكرا بس انا مش عاوز، قولتلك قبل كدة اني مش هتجوز بالطريقة دي
زمت كريمان شفتيها تجيبه بضيق:
_اذا هتتجوز بأى طريقة يا انس؟ انس يا حبيبى انت عديت التلاتين، هتفضل مستني لحد امتى!!
انت قولت مش عاوز صالونات فسيبناك تختار، لكن فى النهاية مفيش بنت عاجباك.
ايه يا انس هتفضل عازف عن الجواز لحد امتى؟
اعتدل انس فى جلسته يجيبها بتعقل:
_يا ماما يا حبيبتى انا مش رافض ولا حاجة بس البنت اللى مقسومالي واللى نصيبي فيها لسة مظهرتش
اعتدلت كريمان لتصبح مواجهة لصغيرها وهي تجيبه بهجوم وتهكم:
_وهتظهر امتى ان شاء الله؟
انس يا حبيبي لو فضلنا ماسكين فى الكلام ده وجو الحب وان الهوا يطير ويلعب فى شعرها يبقى مش هتتجوز.
ثم اشارت بعدها جهة هشام وندى مكملة بضيق:
_ بص لاخوك يا انس، اخوك اكبر منك بسنتين بس واديه معاه مازن وكمان ندى قربت تولد التانى، فقولي امتى هتفكر في نفسك ده العمر بيضيع يا ابني
زفر انس الهواء من صدره بضيق من هذا الحديث الذي لا يرجى ليجيبها بعدها بتعقل:
_ماما يا حبيبتى انا مش مراهق علشان افكر كدة، ولا انا تافه مثلا علشان ابص للشكل انما انا راجل عاقل،
انا مش بدور على واجهه انما بدور على واحدة تكملنى، واحدة احس معاها اني عايش