ابتسمت كريمان وهي تضع قبضتها اسفل وجنتها هامسة بمرح:
_وطبعا انت بتفكر انك تحول الرواية اللى شدتك دي لفيلم او مسلسل علشان الناس كلها تستفيد، وبتفكر ان ده هيعلي الفن لان الناس هتشوف حاجة نضيفة واقعية ومحترمة بدل الكلام الفاضي اللي بيتعرض.
تعالت ضحكات انس المرحة وهو يستمع كلمات والداته والتى يبدو انها كانت تعيش داخل رأسه ليرفع عينيه جهة والدته مجيبًا بمرح:
_ مفيش حد قادر يفهمني ادك يا ماما
وقبل ان تجيبه تفاجأ بذلك الجسد الذى يلقى بجواره وصوت صاحبه الذي خرج مرحًا تماشيا مع سحب تفاحة من الطبق الموجود على الطاولة الصغيرة امامهم:
_مش ماما بس اللى قادرة تتوقعك، ده اي حد يتعرف عليك قادر يتوقعك يا انس بيه.
قضم التفاحة بيده يلوكها وهو يكمل بمرح:
_انت مفيش فى دماغك غير حاجة واحدة بس وهي الفن والافلام والمسلسلات.
واى حاجة تشوفها بتبقى عاوز تعملها مسلسل، مش بس الروايات بس لا، ده حتى لو سمعت حكاية من حد فى الشارع هتحاول تدور على كاتب يعملها سيناريو لفيلم
ضحك انس وهو يسحب التفاحة من يد شقيقة يقضمها بعفوية ثم ألقاها له مرة اخرى وهو يجيبه بمرح:
_اهو على الاقل انا دماغي مفهومة انما انت بقى عارف ايه اللى فى دماغك يا هشام؟