ثم اكمل بعدها بمرح:
_او انه اعمى ومش بيشوف وفى الحالة دى هو إللى محتاج نضارة، فاهمة؟
ابتسمت وهى تنظر له بينما اكمل بصدق وتعقل:
_بيتهيألي الشاب إللى قالك كدة تافه وميستحقش انك تفكرى فيه، وهو فعلا إللى محتاج يلبس نضارة، ومش بس كدة لا، دة محتاج يغير الجزمة الغالية إللى فى رأسه ويشترى بدالها عقل ويملاه بدل ما هو فاضى كدة
اتسعت عيناها وهى لا تصدق بأن اخيها قد فهم مشكلتها لترتبك وقتها وتتعثر فى الكلام قائلة بخجل:
_ سامح، انا اقصد انه…
ابتسم سامح بحنان ثم ربت على رأسها قائلا بلطف وتفهم:
_مش صعب عليا انى افهم ان اختى بتحب، لانه كان باين اوى وقتها لكنى استنيتك تيجي وتحكى لكن للاسف ما حكيتش، وبرضو عرفت أنكم انفصلتو لما لقيتك زعلانة كدة واستنيتك تحكى وبرضو مفيش امل، لكن دلوقتى بعد ما فهمت الموضوع اقدر اقولك دة تافة ومايتزعلش عليه.
ثم أكمل بعدها بمرح:
_ وان كلمك مرة تانية، فبالكتاب إللى فى ايدك وتديه على دماغه، مع انى متأكد أن الكتاب نفسه هيتضايق لانه هيقل من مقامه ويعاقب دماغ فاضية كدة.
ضحكت شروق برقة وقد تعالى صوت ضحكاتها المرحة فى انحاء الغرفة وهى تشكر الله على وجود أخيها بحياتها.
ولكن ضحكاتها توقفت بل وركضت خارج الغرفة بهلع هى وشقيقها حينما سمعت طرق على باب المنزل، لا لم يكن طرق بل وكأن أحدهم يحاول تكسيره ويده الموضوعة على الجرس تكاد تصم اذانهم.