_بالراحة على البت خوفتيها، ايه ماشوفتيش بنات قبل كدة يا صفية؟؟
ابتسمت صفية ابتسامة امومية صادقة وهى تربت على كتف لوجين قائلة بحنان:
_بس دى مش مجرد بنت لا، لوجين هى بنتى إللى مخلفتهاش، خطيبة ابنى وحبيبته واللي هتكون فى كفة والدنيا كلها فى كفة
ابتسمت لوجين بتأثر بينما التفتت صفية تجاهها قائلة بحب و امومة فياضة:
_لوجين، انا من النهاردة زى ماما ان مقدرتيش تعتبرينى ماما فعلا، يعنى إللى محتاجاه تعالى قوليهولى، انا جنبك يا بنتى مهما حصل.
صمتت ثم اكملت بتفهم:
_ انا عارفة انك مستغربة الجو و انك كمان مش متعودة علينا، وعارفة انك حتى مستغربة المكان لكن والله انتى مش هتلاقى احسن من هنا، هتحبى المكان والناس وهتحسى بالانتماء لان انتِ من الاساس اصلك هنا مش هناك واللى بيحبوكى هنا متخافيش ماشى؟؟
ثم أضافت بمزاح:
_اه مش هتلاقى التقدم والنضافة إللى عندكم، وهتعانى شوية، لكن وجودك وسط إللى بيحبوكى بالدنيا، فعاوزاكى ماتتكسفيش، وانا وبابا رأفت هنا وهنحطك جوة عنينا ماشى؟؟
اومأت لوجين برأسها بابتسامة ناعمة لتحتضنها صفية بحنان وحب مربتة على كتفها بحنان قائلة:
_يا حبيبتى يا بنتى، انا عارفة انك بعدم وجود ماما حاسة انك تايهة بس انا هنا مكان ماما يا قلبى