واثقة انه عقليته زى مامتك كل إللى يهمه الحب رغم اختلاف الثقافات ولا اول موقف هيحصل هيشتمك بانك عربيه؟؟
عمرك فكرتى فى حاجة زى كدة ولا بالنسبالك الحب مجرد كلمة حلوة وخروجة وفسحة وأمير وسيم يخطفك على حصانه الابيض ويطير بيكِ فوق السحاب؟؟
احتدت عيني لوجين حينما واجهها بكل تلك الحقائق والتي كانت تخشاها لتنظر له صارخة بغضب:
_انت بتسخر من احلامى؟؟
نفى برأسه مجيبًا بحزن:
_عرفتى بقى انك معرفتنيش وكل إللى يهمك انك تتكلمى وبس؟
انا عمرى ما سخرت منك، انا بس بواجهك بالواقع.
الحب مش شئ وحش، انك تتمنى حب يعدى كل الحدود مش جريمة، كلنا بنحلم بأننا نحب ونتحب، بس لازم الاول تفكري فى الانسان اللي ترتبطى بيه وتديله قلبك
بأنه هل هيقدر يتعامل بلين مع غضبك ولا لا؟؟ هيقدر تضحيتك علشانه ولا لا؟؟ يضحى بنفسه علشانك ولا لا؟؟ يحتوى غضبك بحنان و يسيبك تطلعيه عليه وقدامه بس علشان خايف عليكِ من الكبت ولا لا؟؟
انسان مجرد ما تشوفيه تلاقى الابتسامة اترسمت على وشك من كل اللي بيقدمهولك، يحبك لذاتك مش علشان عاوز منك حاجة.
يحبك فى طفوليتك وفى نضجك بنفس المقدار.
يشتاق يشوفك بمجرد ما تسيبيه، يبكى قدامك بدون اهتمام لرجولته لانه عارف انه ضعفه قدامك قوة لانك سكنه.