انتِ هبلة يا لوجين، لأن يهمك يكون حواليك ناس من غير ما تهتمى اذا كانو عاوزينك تبقي احسن ولا نفسهم يوقعوكى ولا حتى متفرقيش معاهم.
صمت يتابع تأثير كلماته على ملامحها الشفافة والتى تؤكد له صدق حديثه وكإنه كان يعيش داخل عقلها تماشيًا مع إلتماع الدموع بمقلتيها ألمًا على حالها.
تألم لرؤيتها هكذا ولكنه مع ذلك قسى قلبه وهو يكمل بقوة:
_ انا مختلف عنك تماما يا لوجين، انا يهمنى انى اكون حتى لو فى حياة إنسان واحد وبيحبني بصدق افضل من انى اكون في حياة ألف وانا بالنسبالهم كمالة عدد
صمت يتكئ بظهره على مقعده ليواجهها بأسوأ قرارها:
_على سبيل المثال، انتِ يهمك انك تحبى وتتحبى فاخترتى اول واحد سمعك واهتم بيكِ بس مع ذلك ما اهتمتيش انك تتاكدي اذا كان بيحبك فعلًا ومستعد يضحي بحياته علشانك ولا لا كل إللى يهمك انه يقولك كلام حلو ويخرج معاكي
نفى براسه يكمل بثقة:
_ الحب أفعال مش أقوال يا لوجين، يعنى لو بيحبك بجد وشاف راجل بيكلمك كان غار عليكِ، لقاه بيزعقلك وطريقته واضحة انه غضبان منك كان وقف قدامك وحماكِ منه، لقاكى خارجة وسيباه كان جرى وراكِ او حتى وصلك علشان يطمن عليكِ، مكانش سمح لحد يزعقلك، لكن دة ما اهتمش.
هل يا ترى لو اتجوزتيه واثقة انه هيخاف عليكِ من الهوا الطاير؟ هيكون اب حقيقى وزوج بجد ولا مجرد تافه كل إللى يهمه الفسح وان مكانش معاكِ يبقى مع غيرك؟؟ هل يا ترى واثقة انه معاكِ علشانك ولا علشان فلوس باباكِ؟؟