قضمت لوجين شفتيها بضيق من تجاهله لها لترسم بعدها ابتسامة مرحة على شفتيها قائلة بحماس:
_ طيب ايه رأيك انا عزماك على حسابى النهاردة؟
ارتفع حاجبه لها بضيق من اسلوبها الطفولي لاستمالة مسامحته ليعود بنظره بعدها تجاه حاسوبه قائلا بجمود:
_لا معلش انا مش فاضى.
ثم اكمل بعدها بنبرة ذات مغزى:
_ وبعدين انا راجل شرقي مقبلش أن واحدة تدفعلى او تصرف عليّٰ
قضمت لوجين شفتيها بضيق من عناده لتقول بابتسامة مرحة:
_ خلاص اعزمنى انت
نفى مروان برأسه يجيبها بحسم:
_اسف بس انا ميزانيتى لا تسمح، اصل انا لسة جاى من بلدنا طازة
صرت على أسنانها بغيظ من تعنته معها لتقبض على كفها قائلة بضيق:
_اوكى يبقى كل واحد يدفع لنفسه
نفى برأسه وهو مازال ينظر جهة حاسوبه ويطرق بأصابعه على أزراره:
_لا معلش مش فاضى، أن جاى هنا أثبت نفسى مش الف ورا الناس.
ثم رفع عينيه جهتها قائلا بنبرة ذات مغزى:
_ اصل انا مش برفع نفسي على حساب حد لان دي مش أخلاقي
ترقرقت الدموع فى عينيها من محاولة تذكيرها بخطأها معه لتقول بصوت متحشرج:
_خلاص يا مروان بلاش الأسلوب دة معايا، عرفت انى كنت واطية واسلوبى زبالة معاك بس والله ما كنت اقصد، انا كنت خايفة من إللى حصل وكنت خايفة لتقول لبابا.
وبعدين انا كنت حاسة بالدونية والقرف من نفسى بعد كل اللى وصلتله ومواجهتك ليا فللاسف طلعت ده عليك فمتزعلش منى