اومأت شروق وهى تجيبها بابتسامة:
_واضح من نظراتك للناس وعدم معرفتك بالمكان، بس اكيد هنا ماتساويش جامعتك فى انجلترا
ضحكت قائلة
أكيد، انا اصلا جيت هنا علشان…..
توقفت شروق مكانها قائلة بتعقل:
_لوجين، انتِ واضح عليكِ ودودة وطيبة بس مش كل الناس هنا كدة، فيه ناس نفسهم يعرفو معلومات عنك علشان يتقربو منك ويؤذوكِ او حتى يعرفو انتِ بتملكي ايه ويقرروا هيستفادو من وراكِ ايه، علشان كدة نصيحة مني بلاش تثقى في حد قابلتيه لأول مرة، فاهمانى؟؟
هزت لوجين رأسها تجيبها ببراءة:
_بس انا هنا فى وسط اهلى
نفت شروق برأسها قائلة بهدوء:
_مفيش حاجة اسمها وسط اهلك، هنا زى اي مكان في العالم، فيه الكويس وفيه الوحش، فيه اللي هيقرب منك انبهار وفيه اللي هيقرب منك استفادة، وفيه الذئاب اللي هتنهش فى لحمك، زي برضو ما فيه اللى هيقرب منك حبا وهيبقو دول اللي طلعتي بيهم من الدنيا.
علشان كدة متفتحيش قلبك للكل.
ثم نظرت لها من أعلى لأسفل بتقييم قائلة:
_من الواضح عليكِ انك بنت حد غنى فخلى بالك من نفسك، انتِ جميلة، وغنية، وجديدة فى المكان فهتبقى فرصة لأى حد، اوكى؟
ابتسمت لوجين جهتها بنعومة لتبتسم لها شروق برقة ثم عدلت وضعية نظاراتها لتشير بعدها جهة غرفة بعينها وهي تقول برقة: