_مروان ماتكلمنيش كدة
كز على اسنانه ليهدر بغضب اعمى:
_ما اكلمكيش كدة ازاى دة انا الود ودي دلوقتى اخبط دماغك دى فى اقرب حيطة علشان ارتاح، بقى انا عمال اكلمك عن الحب وفي الاخر تقوليلي تتجوزنى!!
نظرت له لتحرك يديها لأسفل و لأعلى علامة أن يهدأ قائلة باستعطاف:
_طيب اهدى بس وانا هفهمك
عض على لسانه يمنع خروج ما يشين ليلتفت بعدها جهتها يرميها بنظرة قاتلة ولكن، وامام نظرتها الوديعة اشار لها قائلا من بين اسنانه:
_اتنيلى اتحفينى واشرحيلي
ابتسمت بتوتر لتقول ببراءة كادت تقتله:
_مش انت قولتلى انى لازم اتجوز انسان شهم، وجدع، يكون دمه حامى، وبيغير عليا، يفهمنى، ويقدّر مشاعرى ويكون حنين معايا؟
اومأ برأسه ومازالت ملامحه على تجهمها وهو يقول بغضب مكبوت:
_ايوة قولت، بس انا مالي بقى
اتسعت ابتسامتها من الاذن الأخرى لتقول بتفكه:
_ماهو انت إللى وقع عليك الاختيار. اولا دمك حامى ولما لقيتنى لابسة مش محترم كنت هتموتنى، بتفهمنى اكتر من نفسى، بعرف احكى معاك وانا مرتاحة، فاهم يعنى ايه حب ومش بتقل منه زى اغلب رجالة الشرق، بتعامل المرأة على انها ملكة، جدع وشهم ومن نفس ثقافتى، عندك مشاعر واحاسيس حلوة اوى، ودمك خفيف يعنى هتضحكني، وفوق كله دة باباك وبابتى اصحاب