رد بصوت يشبه الهمس: “هروح أجيبها يوم الجمعة”
ورأت في عينيه سعادة بالغة،
فقالت له : “أشرف… انا طبعا عارفاك كويس جدا، وعارفة أنت قد إيه
بتراعي ربنا في هويدا وفي معاملتك ليها أنا بس يا حبيبي بفكرك
بالعدل أهم من أي حاجة وقبل أي حاجة ….أنا عارفة ان قلوبنا مش
بإيدينا، بس التصرفات اللي في إيدينا تحاول تعدل فيها”
رد عليها: “حاضر يا ماما حضرتك ماتقلقيش نفسك بالموضوع ده”
ثم قالت له: “معلش عايزة منك حاجة كمان ياريت تراعي مشاعر
هويدا”.. رد قائلا بضيق: “أكثر من كده يا ماما أعمل إيه تاني؟”
فقالت: “والله أنا عارفة إنك بتراعي ربنا فيها لكن معلش هي كمان
الموضوع مش سهل عليها يا حبيبي أصل الغيرة دي نار بتفضل تحرق
في صاحبها…… “
رد قائلا: “ولا سهل عليا أنا كمان ….أسبوع وأنا كاتب كتابي ولحد
النهاردة مراتي بتكلمني كأني راجل غريب الكلمة على قد السؤال”…
فقالت: “معلش يا حبيبي هي كمان معذورة استحملها شوية”
فقال لها: “والله أنا عارف ومقدر كل ده بس بلاش حضرتك تضغطي
عليا زيادة”…..
فربتت على كتفه بحنان جارف وقالت: “حقك عليا لكن هتعمل إيه؟
انت كبير العيلة دي ولازم تحتوي الكل”
فتنهد بعمق ثم قال: “حاضر يا ماما اللي حضرتك تؤمري بيه”