رهف…شكد جاي احاول اشغل نفسي واطلع من هاي الحاله
بس اجذب اذا اكول عادي
نسيت وجاي اعيش حياتي
اني بطبيعتي انسانه حساسه ومااكدر اتخطى بسرعه
المهم اني كدام الناس ابين اني عادي طبيعيه
والأمور تمام
حتى لا يكولون عليه ضعيفه
بس مجرد مااكون وحدي تهجم عليه الأفكار وتحاصرني
وتخليني ارجع النقطة البدايه
اكيد راح اجاوز كلشي بيوم من الايام بس محتاجه
صبر ووقت الانسان الي يحب من صدك مايكدر يتخطى بسهوله
شكران نشرت حنتها ستوري
دائما من اشوف تصرفات شكران احاول احلل شخصيتها
ليش هي هيج انانيه واستفزازيه
ليش هلكد شايله حقد
معقوله كلبها اسود الهلدرجه بحيث ماهان عليها
اني ازوج واستقر وماشافت بهاي الدنيا كلها غير عصام تخلي عينها علي
يارب اريدك اتساعدني حتى اتخطى واعيش حياة طبيعيه حالي حال باقي البنات
اريدك تقويني وتصبرني وتشد عزيمتي انت اعلم بحالي يارب لا تنساني من عطفك وكرمك
بيوم عرس شكران عمي اجاني من الصبح
يريد يشوفني مقهوره زعلانه ضايجه يارب ماكو اطيب من كلبه بهاي الدنيا شايل همي خايف ازعل