رواية كفي والمنجمة الفصل الخامس 5 بقلم الكاتبة Leo alfatlawi
بارت الخامس
باوعلي وكام على السريع كمش اديها
—يمه دخيلج مووكتج لاتزيديها اطلكها ميخالف بس موهسه لاتفضحينه چدام العالم هاي بت عمي محسوبه عليه
–ولك مؤتمن ربيت وكبرت تاليتك لبت فريال عليش ولك يمه تحرك كليبي نسيت عمايلها بينه
–لامانسيت بس صار شي اقوه مني وروح عمي وراسج التردي يجرالج لاتگدرين روحج
–طلچها
–اطلچها بس انطيني مجال اشويه مصار كم يوم عندي راح يطلع حجي بالديره وشماتي اچثار ماراح اخلص لخاطر محمد لاتعلين كلبي اكثر ماهوه معلول
–جاوانته شنهو السويته ماعليت افادي
–ادري يمه ادري كارهتها وادري عملتها ماكو شريفه اتسويها بس صارت وغصبآ عني مااگدرت احلها غير بهالطريچه
–لاهذه جدك الخلاك تاخذها اعرفنه يحب معتصم ورادها بس ترجع بته
— لاموجدي صارت سالفه ولميتها
–اكيد فريال وراها والاماكو مصيبه اذا مابيها ايد خوهيه ميته هسه من الفرح من اخذت ابني مني
–يمه تره غزل اخذتها غصبا عنها جبتها من بين عيونها عفتها اتنوح وراها
–عساها ضلت عمرها تنوح وماشافت الراحه شوف يمؤتمن هاي مره متصيرلك واذا لكيتك واصل صوبها انته موش ابني
–لاامني اصلا ماامعتبرها مره ولااصل صوبها
–يعبر شهر وتطلج واتخليها بس للخدمه متردها لمها
–سهلا ميكون خاطرج اله طيب تامرين على راسي
راح باس راسها واخذها وطلعو واني اتكول ماموجوده يمهم من يحجون غير بشر ذوله صدك ماكو احساس اقلها حسبو احساب مشاعري جبتوني مناك وطلكني من رجلي وهسه يريدني اخدم
والله من فدوه اروح لماما على عملتها بيهم حيل بيهم بس حزت ابنفسي كلام مؤتمن يعني لان ماعندي احد هيج يسوي بيه ابكيفه يزوج ويطلك ماحاسب احساب لامشاعر ولا گلب اتكول حيوان وبكيفه يقرر مصيره
كمت مسحت ادموعي على شنو ابجي ميستاهلون دمعه مني واذا طلكني شنو اصلا اني اتمنه يطلكني يوم قبل باجر هم حاسبين روحهم بشر ذوله حتى الحيوانات هم ارحم منهم
اخذت نفس هدأت روحي حرمات اضوج روحي لخاطر كلامهم وفرعنتهم اعرفهم ناس ماعدهم مخافت الله هم اني ثوله وهيه امه اتكول سعلوه وشايله خبث بس الله اليعلم اشكد واني اكول عليمن طالعه رجاء
لكيت غتره مكرم يمي اخذتها وخليت شال على راسي خفيف بس اشلون اخلي ثابت مااعرف اخلي منا يروح منا يلا المهم ميحجي موجود
رحت للمرايه عدلت شكلي مااريدهن يحسن اني ضعيفه ومتأثره بكلامهم لوخايفه منهم خلي يعرفون اني قويه ومراح يهمني شنو يسوون
لاوكل الي يشوفني يباركلي لباله صدك عروس وانوب حاسداتني عليه خلي يجن يشوفن وين طامسه اني يلا ارجع واكول خليهم امصدكين خليني عايشه الدور واحرك كلب كم وحده اهنا هيه مهمه اخلصها وارجع لماما
مااعرف ليش دااحس اجذب على روحي لان احس من جوه مشتعله نار
طلعت من الغرفه لكيتهم مخبوصين بالطبخ وصايره هوسه ناس كومه
رحت ادور على مكرم خطيه ارجعله مالته لكيته واكف يطبخ ويمه كاظم الله منظرهم حلوه وهمه يطبخون رحت يمه انطيتها اله كال ماخليتيها
–لاعندي شال
–الله يطيح حظج راحت هيبه الزلم جاهاي اتجيبيها ويه الشال
–العفو لعد والله مااعرف غير اتعلموني
–باوعلي ادموعي بعيوني كال يابه ولايهمج اتشاقه وياج عليش تبجين
–ماابجي مسحت اعيوني
–مؤتمن طكج
–هئ
–يلا اتهون واتصير اسوالف خليج قويه بويه تره فهاوتج متفيد اهنا تنوكلين صيري مره حوك تاخذ حقها بيدها
–امم
–لاهاي ربحه بويه اكلج صيري حوك اتكولين ممم غزل روحي منا لااغطج بالكدر
جان مؤتمن ورانه جاي كله اتغطمن ولك بالچدر
باوعتله وانداريت ابسرعه حسيته جرني من شعري كال هذه اشوكت اتضمي
–مولابسه شال
–وينه هذه هم يسمه حجاب مقتنعه
–مؤتمن وخر هسه راجعه للغرفه بعد مااطلع محد راح يشوفني
–يكون احسن يلا ولي منا
ام مؤتمن. جاحضر روحك ييمه منا وجاي تشبع مغمه من العالم على فضايحها غير مثل امها ماتعرف الستر شنو
–يمه كافي العالم اهنا صدك تحجين
–يااا وانوب ماراضي عالحجي ولك اتسكتني ياچبير اخوتك لجل وحده حتى مامتأكدين هيه بت عمك صدك
–لخاطرررر محمد بسج العالم واكفه استغفر الله
–والله اشوف بيك معتصم تاليتك مثله
–احركها لخاطر اصدكين متكليلي شسوي
وانتي يلا ولي لغرفتج مااريد المح ضلج بالبيت
عفتهم ورحت سمعت مكرم يحجي ويا ماراضي على تصرفاته
فتحت الغرفه ودخلت بس جنت صدك مخنوكه مااكدر على حياتهم اني حياتي تختلف اشكد اريد اتحمل مستحيل راح اكدر تعبت واني مصار ايام يمهم الله ينتقم منك مؤتمن شجابك عليه شمرت الشال فتحت الكنتور حسيت روحي مختنكه بالبس اني موهذه لبسي ولاهاي حياتي ليش جابره روحي بيهن جنت احجي وابجي وصلت مرحله بعد مااتحمل ماكو انسان ابين ليله ويوم يجبرو يغير حياته ميه وثمانين درجه ويتقبل هالشي
اخذت اتراك ورحت للحمام بدلت وكفت على المغسله غسلت وجهي بس اريد ابطل بجي بس الشهكه احسها تطلع من كلبي فتحت شعري بلكي اهدء
باوعت لروحي بالمرايه اشلون راح اتعيشين وياهم اتعرفين روحج وين انتي لوشنو دسوين منو ذوله الطلعو فجأه ويحاسبوج على كلشي ويامسهل الضرب اتكول حيوانه بلامشعر لاويطلعون انتقامات بيج
كعدت يم المغسله منهاره
خليت راسي بين رجليه سمعت باب الحمام انفتحت شلت راسي لكيت سماح كدامي
–اشمالج خيه
–شنو المابيه جنت احجي وابجي
–منهو ضوجج
–منو غيره يعني اني مااريده ولاراح اكدر اعيش ويا مستحيل اني حياتي غير وحتى كلبي موهنا لويش يجبرني اسوي شي غصبا عني بشنو اذيته وهيج ديسوي بيه والله مالي دخل بيكم ولااعرفكم لويش دتنتقمون مني
–دكومي ياعيني كافي بجي
–انتو مدتحسون بيه اني حياتي ادمرت دااحس روحي حشره ابيناتكم ودايسين عليه تره اني بشر لويش ديسوي هيج بيه يعني هوه ماعنده كلب ولامشاعر ليش امفكر كولها مثله ماما مأاذيته يجي ينتقم مني اني ويسود عيشتي ابأاي ذنب استحق هذه منه
عمري لاشايفته ولاماذيته لويش ديسوي بيه كل هذه
–غزل والله هوه دزني كال شوفيها تره والله غصبا عنه الجاي يصير لاتصوري راضي بالصار تره جدو غصبه كله اخذها هوه حاله حالج اصلا ماراد اذيتج
–لاصح مارادها بالاحرى راد يزوجني لفلاح بس خاف ينفضح كدامه انو اني مطلقه فتزوجني هوه ولم السالفه
–شنهو انتي مطلقه صدك تحجين ؟
–اي لعد مكلج هوه طلكني من زوجي غصبا عنه واخذني
ماحسينه غير باب الحمام اندفرت ودخل صاير اعصاب شالني من ركبتي وحجى من بين اسنونه موحذرتج لولااااااا
–مؤتمن حموت
–ياريت واخلص من عارج
انكطع النفس وسماح اتجر بيده اتريده يوخر واني ادفع بس منكدرله اريد الهوه ارفس بي خلص كل الهوه البريتي بعد مااكدر ادفعه لو اقاوم وهوه جان عامي الغضب استسلمت غمضت اعيوني وخر عني بس بعيديش مااكدر اسحب الهوه انكطع
طحت بالكاع اسمع سماح تلطم اتكله ماتت اشذنبها هاي طفله حسيته شالني
ابين اسمع وبين منتهيه اريد اجر نفس مااكدر
–غزل اخذي نفس غزززززل
بويه جري نفس غزل باوعيلي وهاي اخر كلمه جنت واعيه بيها
فتحت اعيوني اكو جهز جان على خشمي ومخذي مشكل بيدي درت وجهي اني وين شفت جدو كاعد يمي ومؤتمن منتجي يم الباب امدنك
–انتبهلي جدو كال هايچدي سلامتج
جنت بي ارمش مااكدر احجي شفته شال راسه واجه يمنه بس جان ساكت
–اتحسين شي يجدي اشبلاج يبويه قبل اشويه مابيج شي
مؤتمن. جدي صحت بعد ماعليها شي اخذ الولد ورجعو فشله العالم اهناك اني يمها بس يتحسن وضعها اشوي اطلعها
— لاخلها لمن اتصير زينه لااتطلعها هسه
–هاي هيه تامر
دنك جدي باس راسي وكال هاي موخوش استگبال منج وگعتي گليبي من ول ساعه يلا اريد چاتعوضيني اريد ضحكتج الحلو الجانت اترد
وتجين اطفرين يمي مثل قبل رجع باس راسي وگله ديربالك عليها وطلع
درت وجهي للجهه الثانيه مااريد اشوف وجهه هوه هم ماحجه راح لجهت الشباج وكف يباوع منه ويدخن
دخلت السستر اجيك الاوضاع
— هافقتي الحمد الله على سلامتج فدوه جنج بزونه شنو هالعيون
اخذت الضغط وجيكت والوضع كالت
— اتكدرين تحجين
مارديت
–اتسمعيني
–هزيت راسي ايي
–اتكدرين تحجين جاوبي خلي اسمع صوتج اخاف صار عندج قطع بالاوتار الصوتيه
اشوفه اجه يمي بقلق وخر الجهاز من خشمي وكال غزل احجي
باوعتله ونزلت ادموعي
–راح اجيب الدكتور يشوف حالتها خليك يمها
هيه طلعت وهوه دنك عليه كال غزل احجي بس كلمه لخاطر محمد لاتعلين كلبي
جنت بس ارمش مااكدر ارد او اني مااريد ارد
واصلا كارهته ومااريد يسمع صوتي ولااريد اشوف خلقته من الاساس
اشوفه ضل محتار الدكتور دك الباب راد يدخل
گله انتضر لحضه لم شعري وغطه راسي بغترته فات الدكتور واجه يمي كال بنتي اتكدرين تحجين
–اشرت براسي اي
–سمعينه صوتج
–رديت احجي بس ميطلع صوتي كوه منبوح
–الحمد الله بابا اشويه ويرجع صوتج لاتخافون هاي سبب صارخه عالي وفاقده صوتج
–همست طلعو مااريده اهنا يبقى
اندار على مؤتمن كله ابو الشباب ليش مزعلها
–ضحك ورد لاسوء تفاهم وان شالله ينحل
–اشكد صارلكم متزوجين
–5ايام
–اها بعدكم عرسان لاجابعد الايام طويله راح تشبع شلعان كلب اتحمل
–خلي اتكوم بالسلامه يابه قابلين بشلعان الكلب
–ماعليها بطله اتكوم طالبه انتي
–امم
–ياصف
–خامس
–اها امبين عليج بعد زغيره الموفقيه ان شالله يلا كومي صيري سباعه وحضري روحج ماضل شي عن الدوام
يلا بعد شتريد امبين محظوض حلو وزغيره وطالبه
اباوع مؤتمن اعيونه ناطه بس المصبره جان الدكتور يجيك الوضع
–ضل يسولف اهواي اصلا بالي مويمه لمن كال تقربلك لومن بعيد
–عليش تسأل
–وشنو الفرق اكو ربط بالعلاج لو هيج بس چثرة حجي
–لابس ماكو شبه واشوف فرق بالعمر واضح
–استغفر الله ربي كالها ومسح وجهه يهدء بروحه
–هاي اول زواجه الك لو ماخذ قبلها
–خايب شو بعدد مابيها شي كالها دفعه وشلع السيروم شالني وطلع للسياره صعدني وكال
شمخلي للنسوان دكتور زمال هذه اشكد يلغث
رجعنه للبيت بس جنت الطريق كله ساكته جانت عندي حاله من اني وزغيره اذا اتضايقت واصابني توتر اكوم احك بالوريد مال ايدي لمن يطلع الدم ومااحس مااعرف لويش هيج اتصرف
–اشمالج بويه عليش اتحكين ايدج هيج بيج شي
–هئ
–چا بعدي ايدج طلع دمها موكلتلج كصي اضافرج بس اريد افهم شهالعناد البيج
–مارديت
–استغفر الله ربي عدلي حجابج بويه وبعدي ايدج لاتتااذه
غمضت اعيوني بس بطلت وخرت عنها اشويه لاارادي رجعت لنفس الشغله صح اتأذه بس مااحس لان اعصابي متوتره اكون فاقده الاحساس
وكف السياره اخذ اكلنس وسحب ايدي ماردت انطيهيا بس سحبها حيل وضغظ عليها انتبهت اكو دم طالع واني ماحاسه
–غزل اشصابج بويه
جنت بس اباوعله محترك كلبي وحالتي حيل تعبانه مااكدر ارد
اخذ حسره طويله وكال مااريد أذيج انتي اتجبرين الواحد لذيتج كم مره نبهت وكلتلج لاتحجين بس مااعرف من ياطينه مخلوقه وهيج اعنوديه ابتعدي عن امي واسكتي رحمه لموتاج غزل شغله امنعج منها لاتسويها ادري ضغطت عليج اهواي ومالج ذنب بالصار بس ممنوع اتعيدين الحجيتي غزل حذرتج مره والثانيه انوب انهيج تنسين الماضي سمعتيني انتي حرمتي متجيبين طاري احد غيري
درت وجهي للجامه وسحبت ايدي منه
رجع شغل سيارته وطلعنه الطريق مو بعيد اشويه وصلنه نزلت دخلت من باب الخلفي للبيت لكيت عمه وسماح وكم وحده من البنات بالباب اجت عمتي كالت ياعين ماصلت عالنبي من شافتج
اخذتني ودخلت للغرفه رحت للفرشه خليت راسي واتغطيت ردت بس انام اخلص من واقعي هذه كالت يمه غزل الغده صاير اجيبلج
— لا بس طلعي اريد انام
–يعمه وجهج اصفر دگومي اكليلج لكمه
–مااكدر عمه نعسانها وتعبانه
يلا على راحتج كالتها وطلعت نمت للمغرب يالله كعدت على صوت هيفاء كالت جدي يريدج
–تمام هسه اجي بس اغسل وجهي
كمت بس بعدني دايخه غسلت وجهي وشلت شعري اشلون مجان مابدلت اعناد بيهم اريد اشوف شيسوون
طلعت حتى حجاب مالبست اريده يموت مثل مدايسوي بيه رحت لغرفه العجوز النحسه دخلت شفت جدو والولد كلهم كاعدين اشرلي تعالي رحت يمه كعدت حضني وباسني كال
–اشلون صرتي
–اشرتله زينه
باوعت مؤتمن امدنك ويحرك رجلي بتوتر عرفته ماعاجبه منضري والله اذا ماموتك مااطلع غزل اتريدني خدامه لمك وتكتل بيه بسيطه
دخل احمد جان يخابر من شافني كطع مخابرته وكال شنهو هاي عليش هيج اطالعه اجه يمي متحامي
— جدو. هوووبك وين اتريد فنك تچيسها اچسر العصه على اعضامك
–جدي متشوفها تراها موش زغيره
–مالك شغل هذه رجلها واني يمها انته مالك حق بعد تفج حلچك
جان جدو خالني ابحضنه باسني وهمس يم اذني لاتخافين يبويه واليوصل يمج احركه
من سمعته مااعرف اشصار بيه
العجوز. اشبيج يالفاهيه عليش طحتي مشايفه حمام بت الفكر
شلت راسي داارد شفت رجال جبير بالعمر صافن ابوجهي استحيت ماانتبهتله من فتت وماسلمت بس جان يباوعلي بطريقه موطبيعيه اتكول امتيه شي بوجهي
دخلت وجه الشؤم ام مؤتمن كعدت يم الرجال عرفته هذه التحفه عمي اتباوعلي اتكول مباوعه حشره كدامها
مااهتميت درت وجهي جانو يحجون بس انتبهت اشلون يهابون جدو ويخافون منه وكل اشويه مرزله واحد
الولد جانو يتشاقون ويا علاقتهم حلوه
مكرم. اي يجدي اشوكت ناوي تفتح الجنط وتوزع الهدايه
جدو. دگوم جيبها وتعالي كرب صوبي حتى تنطيهم كلمن هديته
جاب الجنطه مكرم فتحها
جدو. هاي الكلبيات والعبي للبنيات هاجن بويه
سماح. ربي يحفضك النه يجدي
ويحفظكم يبويه وذني الدشاديش والغتر الكم هاك مكرم انطي لخوتك
اهم شي الغتر لان هاليام ميتلحك علينه اطلعها منا تروح منا جان يحجي ويباوعلي
وهاي السبحه ام الفصوص لشيخنه ونذرتلك السنه الجايه عمره من يجي ابنكم
مؤتمن. الله كريم اذا مقسوم يجي
جدو. وهاي الكلاده الذهب الج يبويه هديه زواجج
صفنت ابوجهه شنو يحجي بعدين اتذكرت يااا اني متزوجه
مكرم. هههههههههههاي استلم بالله لااجه ولي العهد واذا هيه متذكر مزوجه لولا
اخذتها واتشكرت منه خليتها على جها لان اني اصلامااحب البس ذهب
وهذه الجادر هم الج بلكي الله يهديج وتتعلمين الحجاب
ام مكرم. ابروح ابوج خلي اشوفه عليج لبسي يعمه
ؤك عمه كلتها ولبسته
يمه صدقه لمحمد جنج حويه كون الله يهديج واتضلين هيج
باوعت مؤتمن يباوعلي نزعته بعناده كلتلها بعدني ماامفكره اتحجب هسه
احمد. موابكيفج هيه وروح ابوي اذا الكفج ادفنج مچانج
جدو. هاي المره حجيت مره ثانيه اطردك بره
ام مؤتمن. والله وردت فريال وردو ولدنا ينطردون
انتي انكتمي مااهيس حسج وكومي من وجهي يلا فارجينه
العجوز. هاااا هيج صارت يالجبير يمكن اني هم يلحكني السره وانطرد
يابه تركو البت اشبلاكم تسودنتو اشتردون منها شوفو كدام الكل هاي بت معتصم الله يرحمه وعزيزة كلبه اليوصل صوبها اله ميريد روحه
وانتي يجدي اي واحد يضوجج بس شاوريني عنه اكسرلج راسه
باوعت لمؤتمن هوه راسن ابتسم ودنك
جدو. هذه تكسير راسه بعدين ادري يجدي
شعامل بيج
عمتي ضلت اتسولف اتريد اترد الضحكه والتهو يسولفون وكالت اريد ازوج مكرم
— مااتزوج شنو خبل اجيب عله على كلبي مو اشوف القبلي استفاد حتى اصير مثله
همه يحجون ودخل احمد اشر لمؤتمن كامله طلع اشويه واجه كال لجدي تعال عنده شغله وياك كام جدو
واني رحت لغرفتي لان طلع جدو بعد اشعدي مكابله السعالو داوصل للغرفه اشوف مكرم اجه ابسرعه اسمعه كال لحمد اشغل عمك لااتخلي يوصل للديوانيه
— احمد. خلي طلقه ابراسه وخلصونه منه
–مووكتك روح لعمك قبل لايلحكنه
–راح احمد عرفت ديحجون عن سيف لان احمد جان يحجي ويباوعلي
لحكت مكرم اكو باب طالع على البيت من الديوانيه رحت وكفت وراها اسمع صوت سيف يتوسل بجدو يكله والله ردت اجي اخطبها منك بس ماانطيتونه مجال راد يزوجها لفلاح عدكم وطريت اتزوجها بس ردت احافظ عليها جان يحجي ويبجي سوه
— صارت بذمت رجال وراد يچتلك من اول جيه الك اهنا بس اني منعته
هاي جيه بعد اذا لمحت ضلك صوب بيتنه اخليهم يجتلوك
–بس انتو متعرفون الحرام هاي مرتي سمعت وراها صوته يصيح اااااااا
–دخلت شفت مؤتمن خانگه ويضرب بي كله كم مره كلتلك لاتجيب طاريها
جدو يريد يفك مؤتمن هوه ومكرم بس ميكدروله لمن صاح بصوته قوي مؤتمنننننننن
ركعه بوكس ودفره لمن طاح بالكاع رجع ليورا
اجا جدو خله العوده على راس سيف كله اخر انذار الك مره ثانيه انردك بتابوت ونفصل وراك تنسي هذه البيت وتشيلها من راسك احسن مايجسرك
–مااكدر انساها هاي ربيتها بديه وين جنتو من جنت اداري واكبر اخذتوها عالحاضر يوم يوم اباوعها تكبر كدامي بعد مامكل حجي رجع مؤتمن دفره
يراح يموت هذه كعدت يم الباب اباوعله مااكدر احجي
— اندار مؤتمن شافني كال شجابج اهنا
مارديت لان جنت واصله حاله الانهيار واني اشوف الضلم الكدامي وماكو رحمه واذا بتهم مالهم حق هيج يسوون
جدو. خابرو ابو خلي يجي
اشرلي كال كومي انتي
جدو عوفه الله يخليك كوه تطلع مني الكلمه
مؤتمن جان خال اديه على راسه ويسمعني اشلون اتوسل بجدو يعوفه ويرجع يباوع لسيف اشلون يبجي ويباوعلي
اجه يمي شالني من ايدي حيل وخذني للغرفه ماردت امشي بس سحلني حيل جان صاك على اسنونه وكال امشي اذا هيست حسج انيمج بالنجف اليوم
فتح باب الغرفه ودفعني وسدها
كعدت وره الباب جنت بس ارجف مااعرف شنو احس سيف كسر خاطري صحيح هوه سكران وميحس شنو ديسوي بس ادري بكلبه هسه ميت لشوفتي
خليت راسي على الباب وغمضت اريد اصحي من الشفته بلكي اغمض وافتح يطلع حلم
مرت ساعه واني بعدني على كعدتي روحي جانت رايحه كوه فاتحه عيووني كمت لفراشي اني منا تعبانه واجتني هاي الشغله حسيت من صدك انتهيت رحت للسرير نمت من التعب والتفكير
حسيت احد يربط بيدي فتحت عيني شفت سماح يمي كاعده
سحبت ايدي كالت بس اكمل دقايق هاي شمسويه انتي بيها اباوعلها صدك الفرشه مدمره دم هالكد ماحاكتها ايدي متملخه
–وين سيف
–اجه ابو وعمه اعتذرو من جدي اتعهدو بعد ميوصل كالوله هذه يشرب وميهيس شنو يعمل وجدي كاللكهم اذا شفنا اهنا يرجعلكم بتابوت احنه ناس النه سمعتنه وهاي بتنه واخذناها مالكم شي يمنه وانتو الغلط راجبكم من راسكم لساسكم بس سكتنه لخاطر البت وماكاومناكم
تالي همه اعتذو وتفاهمو ليش هيج مسوين واتعهدو ميوصل كاله ابو راح اسفره مااخلي اهنا اخذو وراحو
–شفتي مؤتمن شنو سوه بي
–غزل مؤتمن مدمر اكثر منج تره ماكو زلمه يشوف مرته تبجي على حبيبها كدامه ويسكت
–لاوالله كولش مفضل علينه ساكت منو خلانه هيج غير عقله المحجر وصلنه لهنا موبس دمرنه خلاني اتمنه الموت وانتي اتكولين ساكت لويش شنو المسواه بعد لوهم صدك بعد ماشفه غليله من ماما
— انتي عليش اتفكرين هالشكل تره هوه دزني عليج كال روحيلها تدرين لسه منايم وراح يصير الصبح
–الله ياخذه
–غزل عليش تدعين تره موبيده انتو جبرتو هيج يسوي حجالي عن الصار انتو غلطانين اشلون اتعقدون بدون لااتكولون لحد شنو ماوراج زلم
–وهاي الزلم الوراي شنو سوت طلكتنا وشنو بعد دتعذب بينه ليش شنو السوينا شنو ذنبنه لوبس اعرف شنو من كلب شايل وشنو الاستفاده من كل هذه اشو جابني وشمرني
–ولج والله ميكدر ينام من طلعو لسه يتكلب من اكله اشبيك يكون منضرهم ميروح من راسي بعدتهم وهمه مالهم ذنب كل ذنبهم حكم عشاير يطبق عليهم ولازم يتنفذ
ولج يسولفي عنكم اشلون واحد يباوع للثاني وهوه ميت قهر يكول اتمنيت اكتلهم واخلص
–يكتلنه هيج سهله ليش ميطلكني
–ماكو واحد يطلك مرته وينطيها لعشيقها وين صايره اهنا مثلج تنچتل
–تره هوه طلكني واخذني منه
–لان زواجكم جان غلط شنو ابكيفج تتزوجين ماعندج اهل حمدي ربج خالج عايشه لسه
سحبت ايدي وكتلها كومي طلعي منا نفس الطينه انتم
–تره اكثر واحد حاس بيكم هوه مؤتمن اتعرفين
–لويش هوه هم يحس لو يعرف شنو الحب
–يعرفه وعايشه قبل لاتتعلمين تحجين
–مثل هذه حيوان مستحيل يعرف يحب
–هذه الحيوان التكولين عنه اكثر بشر حس بالضلم وانحرم من كلبه اسنين ورا هذه الشباج
–مافهمت شنو وره الشباج
—كامت راحت فتحته كالت ذاك البيت بي روحه المؤتمن اهناك حب عمره عايشه
–لعد لويش مااخذها
–جان مشاكل بين العشيرتين بالبدايه ماقبلو ينطوها كتل روحه وراها وده ناس وجاب ناس لمن خله العلاقه ترجع ورجع خطبها
هالمره هم رفضو بس مايأس رجع جاب شيوخ اكبار وهم رجع خطب وافقو جان اسعد بشر ابوكتها لوشايفته متكولين هذه مؤتمن
–امم ولويش مااتزوجو
–طلبت منه يعزل عن جدته لان امها متحب الجده كالتله تشتريلي بيت غير مچان جان متردد لان ميطلع من بيت جده بس جدو اصر علي تالي وافق يعزللها
–مم وبعدين شنو الصار
–ابيوم دزو علي وماعرفنه شنو طلبو منه لوكالوله رجع لجدتي كلها زوجيني الترديها بعد مااخذ تهاني
جدتي اخذتني اله وصار زواجنه ابسرعه بس اهواي عانيت ويا لان كلبه جان يمها
وماعرفتي شنو طلبو منه اشدعوه ابسرعه اتخله عنها لو يحبها صدك مجان عافها
مؤتمن الحفيد الجبير الكامش شغل جدي ويا بالديوانيه والكعدات كل اعتماده عليه صحيح كاظم ومكرم هم واكفين وياهم بس مو مثل مؤتمن هذه ذراع جدي وميكدر يعوفه بعد مااعتمد علي بكلشي
اشكد اتوسل وفهمها على هذه الشي بس جانت مصممه لبالها راح اتسيطر علي لان يحبها واخر شي ختمتها ويا بطلب ماعرفنا شنو بس الضاهر جانت متأمله يقبل
اتفاجأة من فسخ الخطبه واتزوجنه نفس الاسبوع
–واني اكول لويش يوكف بالساعات يباوع للبيت المقابيلنه يعني مااخذ حبيبته صارت نيته يخرب بين شكو اثنين
–غزل ماخرب لوجاي ابو سيف ومرجعج لهنا وخاطبج مجان ردو بس هوه اخذج لبنه غصبن عليهم وهاي متصير عدهم
–وشعرفه عمو قتيبه بعاداتكم هاي رجال كاضي عمري عايش بره مجان يعرف اكو ناس همج مثلهم هيج تفكيرهم تدرين بس زواج القاصر اهناك يسجنوهم علي مو انوب غصب وضرب فوكه
–حبيبتي تنسين العادات الي عشتيها اهناك انتي هسه عايشه اهنا ومؤتمن صار زوجج كون متفكرين غير بي وتصوني وتحافضين على اسمه
–مااريده ولاراح احبه فد يوم ولامتقبله عيشتي وياكم ماراح اكدر اكمل محد ديحس شنو الاحسه انتو متعودين ولبالكم سهله على الشخص يتقبل عيشتكم
–وعليش اشبيها عيشتنه الشيخ الف وحده تتمنا بس تحجي ويا مو اتصير زوجته
–الف وحده هاي اني مو منهن اني مااطيقه لويش مدتفتهموني وعيشتكم بالنسبه الكم حلوه ومتكيفين عليها بس من اتجيبين شخص عايش بحريه وتحبسي وتقيدي بعادات ماسامع بيها مو شايفها تره مراح يكدر لويش متصورين انو يتقبلها بسهوله اني اتربيت على انو اعيش بحريه واكمل دراسه وكون مستقبل فجأه اشوف روحي متزوجه ومن واحد معقد ومتشدد وميعرف غير الكتل والتسلط وتعالي اتعايشي ويا واتقبلي بكل عيوبه
–كل تفكيرج غلط احنه اهلج وهاي حياتج الاصليه موعشتي بره صرتي منهم تنسين وتتقبلين غصبا عنج
رجعت خليت راسي على المخده كلتلها طفي الضوه لان الحجي ضايع وياكم الغلط مترسخ بدماغكم
غمضت وهيه طلعت وسدت الباب وراها نمت لثاني يوم الضهر ماكعدت ضهري متشنج من النوم وميته جوع شنو ذوله ميكولون اكو وحده اهنا ميته عدله خلي انشوفه يلا هم بعد احسن بس اشعجب رجاء وامها ماسون هجوم لازم الهيبه مانعهم يوصلولي
كمت للحمام اخذت دوش غيرت اتراكي ولبست غيره اريد اطلعه من طوره اريد اكرهه بروحه اذا مااندمه واخلي يرجعني لماما وهوه الممنون
مشطت وشلت شعري وهذه صاير اشطوله حتى اديه ماتت من التعب لازم اكص منه لان موتني
داافتح الباب بس كلبي نغزني اخاف يشوفني ويكتلني هذه خبل
لاشنو يكتلني والله اشكي لجدو اخلي يطيح حظه
فتحت الباب وطلعت ماكو احد امبين متسممين ونايمين رحت للمطبخ مالكيت اكل ذوله شنو ميكولون اكو واحد ماماكل وبعدين وين ودو الحم مال البارحه اشلون خلصو هسه اني وين اروح ميته جوع
ماكو غير عمه اروحلها رحت لغرفتها دكيت الباب اسمعها كالت منو
–فتحت الباب ودخلت عمه ميته جوع
–يخسه الجوع عليش عمه ماكو اكل
–لاولاشي المطبخ يصفر
–يااا ولج هذه الخير كله شنو يصفر
كامت وطلعنه للمطبخ دخلت شافته صدك ماكو شي اشوفه نفخت وكالت بلشن بالخباثه وين ودن الاكل ذني
–عوفج منهن اني حموت جوع
–هسه اكعد مكرم يجيبلج
–لاخطيه عوفي للعصر
–لاخطيه شنهو قابل اتضلين جوعانه وين رجلج
–مااعرف يمكن يم مرته
راحت لغرفه مكرم رحت وراها دخلت لكيته نايم على وجها بس بنطرون بس غير نومه ثگيله ساعه اتكعد بي وهوه مطفي اخر شي كعد يفرك بعيونه باوعلي كدامه اتفاجى كال خير هم انطگيتي
–لاع جوعانه
–المطلوب اكوم اطبخلج
–لااطلبلي
–لاابربج رجلج وينه
–ههههه يم اختك
–الله يطيح حظج وحظ اليسألج ولي طلعي هسه اطلبلج
عمه. امفرغات الغده كله بالزبل والباقي ماعرف المن مطياته حتى ميبقالها
— تركيهن هسه من زين طبخهن اني هم جوعان هسه اطلب
رحت الغرفتي بس نسيت اكوله شنو يطلبلي يلا اي شي المهم اكول
رحت للشباج فتحته امم مؤتمن كون هاي حبيبتك بس حيل بيك من ضلت ابنفسك كون العمر كوله اتضل ابحسرتها وتزوج واحد كدامك وانته اتموت
ردت شي الهي نفسي بي ماكو لازم اخلي يشتريلي فون خومواضل هيج راح يصير بيه توحد
ساعه واندكت الباب رحت فتحتها شفت مكرم مد ايده كال ورقي افلوس الطلبيه
–يااا لعد منيلي احسبها هالمره عزيمه
–رجال فقير منيلي اعزم ورقي يلا راح يبرد
–امم هم صدك روح لغرفه مؤتمن دك الباب راح ينطيك كومه افلوس بس اتعوفه نايم يمها
–مال اتفل بجهرتج هسه هاج اكلي انجبي
–عمه وين
–يمكن نايمه
–لعد انطيني جهازك حباب
–شتسوين بي
–اباوع فلم شي والله ملل
–عوفج من الافلام والتهي بفلم حياتج وعدلي لهجتج المكطمه
عافني وراح ماقبل ينطيني الجهاز عرفته يخاف اعيد السالفه واخبر احد دخلت فتحت لكيته خطيه اشكال طالب اشكد حباب لعد هذه ميتعلم منه اشكد متعجرف
كملت اكل وفتريت وهمه هم ماكو بعدهم مكاعدين لهيت روحي اخلي ميكب مرت ساعه وهم ماكو حس شنو ماتو ذوله غيرت ملابسي لان حسيت روحي من صدك نشاز بينهم لبست واحد من الفساتين جان طويل بس نازك عمه ذوقها يجنن بالملابس
طلعت هدوء ماكو صوت رحت للبستان افتر لكيت مكرم كاعد منتجي عالنخله وخال هاتفون رحت يمه وخره الهاتفون وكال غزل صحيح البستات امسيج بس ميصير هيج لبسج
–لاتره طويل والله
–ميخالف هسه هذه خلي شي على راسج
–حيل شيرجعني للغرفه انطيني هاي
–شنهو هاي غزل ولي منا هاي جديده
–حباب والله مااوصخها يلا
–سحبتها من متنه وخليتها على راسي وكلتله ادنه خلي اكعد يمك
–هاي كاع الله اشكبرها ماكو غير يمي
–مودااريد اباوع وياك بالفون
–انطاني الفون وادنه عني اشويه كعدت يمه
كلبت بالفون ردت ادخل عالفيس سحبه كال خصوصيات لادخلين عليهن
–تمام بس خلي اتصل بماما
–لالاتخليني بمشكله ويه مؤتمن
–لعد ابصديقتي هيه اطمني على ماما فدوه حباب وانته يمي يعني حتسمع شنو حأاحجي حبااااب
— غزل والله مؤتمن ميقبل عليش اتخليني بموقف محرج
–محد حيعرف بس اخبرها واشوف ماما اشلونها ابسرعه واسده
–ابسرعه غزل قبل لايجي خلصينه
اتصلت بيها بالبدايه ماردت عدت اتصال ردت بالبدايه ضلينه نبجي بعدين بدت بالاساله شنو صار وشسويتي واخر شي سالتها عن ماما كالت تعبانه بالمستشفى بس هسه صارت زينه واليوم يطلعوها اهواي سولفنه ومكرم كاعد يقلد على طريقه كلامي لان احجي مكسر كل اشويه اريد اضحك وكوه اكمش روحي مريم جانت تسمعه وتسكت اخر شي كالت منو هذه اليمج بسلا زوجج
–لاع هذه فلاح يشتغل عدنه
رد من الله يطيح حضج على حظ الفلاح الانطاج النقال اخذه وغلقه كاله هسه يجي المشغل الفلاح ويجلفنه سوه
–يلا كومي قبل لايكعدون دخلي جوه لان العالم راح تجي
–شنو تجي مو البارحه اهنا شكو بعد
–حيييل هاي يضلون اسبوع ناس رايحه راده لبالج بعد بغداد يخابروكم يسلمون ويفضوها
–والله احسن اقلها ميزعجون الواحد
–كومي لج ميزعجون لاخوش مرة شيخ والله
امعدله
–شيخ على نفسه محد كله ياخذني
–غزل تره ماارضاها على مؤتمن لاتتجاوزين خلي عليج النفس طيبه عليش نتخارب
–ؤك تمام اسفه خوش ولد هوه بس اشويه متعجرف
–انتي امبين ميصيرلج جاره كومي خويه رجعي لمكانج
–مم حرجع بس كولي مؤتمن بعد يحب تهاني
–منيلج هذه الحجي
–حباب والله محكول لواحد بس كول بعده يحبها ويتمناها لان اشوفه بالساعات يوكف يباوع لبيتهم
–الانسان لو حيب من صدك ماكو ضروف تمنعه ياخذها من بين اعيون السباع
–لعد لويش مااخذها مو يحبها
–يحبها اي بس مو يعشكها يعني حالها من حالجن اذا راد يجيبها يصفها ابصفجن لااكثر ولااقل
–عزااا وانصير 3 الله اشكد حلووو
–دخيل محمد اشكد فاهيه وفطيره يجيب مره ثالثه اتكول اشكد حلوو
–مم وشكو بيها بس كون الله هم تطلع متخلف والله اموت من الضحك على مؤتمن
–غزل بويه ردي لمجانج انتي موبس فطيره ثوله هم
–رجعتله الغتره ودخلت بعدني استوني وصلت للداخل صار بوجهي احمد اتفاجى كال وين جنتي
–هااا جنت اهنا يم مكرم
–وبهذه لبسج وبلا حجاب شتسوين يم مكرم
–بره كاعدين جنت لابسه غترته على راسي هسه ذبيته ولبسي تره فستان طويل مابي شي
اجه بسرعه ضربني حيل وجرني من شعري حسيت انشلع كال اذا شفتج بلاحجاب ازينج صفر وانعل ابو اصلج ودفعني لمن انركعت بالحايط سمعنه جدو صاح شنو صايررر
رحت لغرفتي ابجي ومهضومه اني من ايد لاايد صايره مكفخه اكثر شي يقهرني من احس روحي بلا سند والكل يريد يتشفه بيه واني لاحول ولاقوه
جدو يصيح ورايا تعالي اشبيج يجدي بس مارديت هوه انته كوله ابسببك هسه اجتك الحنيه ورجعتني الك من اشوكت اتذكرتنه ماكلت هاي مامتعلمه علينه عوفوها لو الطمع كتلكم اتخافون على المزرعه اتروح منكم
دخلت للغرفه وعفتهم وراي يتعاركون صحيح اسمع جدو يرزل بااحمد بس شيفيد اذا شغله والثانيه مضروبه ضليت لتالي العصر بالغرفه لمن سماح اجت دكت الباب كمت فتحتها كالت
–عليش حابسه روحج
–اذا كلمااطلع انضرب خليني اهنا احسن
–منهو طكج بعد
–الصخله اخوي
–استغفر الله غزل اتعلمي تحترمين مايصير ياعيني
–لعد مشفتي اشلون ضربني لان جنت يم مكرم
–اشوداج يم مكرم موهمه اروسيه ذوله واحد يكره الثاني
–يسوا ويسوه راسه مكرم يغار منه لان حلو وهوه جنه بريعصي
–استغفر الله غزل اذا اكو بشر يجيب الضرب النفسه هوه انتي هاي الفاضج اشوكت تنسيها واتعدليها
–من يطلكني زوجج ويرجعني لماما
–وهاي شغله ثانيه هم تنسيها يزوج اي بس طلاك ميطلك خليها ابالج
–عوفج منهم تره ضايجه وروحي راح تطلع
–وين تردين اخذج تعالي للبستان نتمشه
تمام بس اخلي شي على راسي
–خليت شال على راسي وطلعنه اغروب هيه اتباوعلي وتضحك اتكول عليمن هالشال ولج شعرج من وره كوله طالع ومن كدام اصلا مامبين لابسه
–لعد شسوي مااعرف وهذه شعري راح اكصه ضوجني اريد اروح صالون فدوه
–اول اخذ الاذن من مؤتمن وبعدين قرري
–تره هذه شعري هوه ماله دخل
–هم صدك بس علي صوتج اشويه خلي انشوف رد فعله شنو
جانت تحجي واتباوع للدرج شلت راسي شفته ينزل من فوك وهاي اول مره اشوفه لابس زي عربي حرمات مثل نوعك يلبسو ويخربون اسم الزلم بي وسماح ركضتله اتريد تاكله اتباوعله وفاكه حلكها عيع هسه هم اشكول والوحده اتباوعله هذه هاي لو شايفه الولد على بحر اشكد كيوت وحلوين جان اسوت
وصل يمي بس جان عاكد احواجبه يباوعلي كال منهو طاگج
–احمد
–عليش طگج
–مارديت خفت هم يضربني لان بلا حجاب جنت بس باوعتله واني ساكته
–سمااح روحي بويه جيبيلي مي وانتي تعالي كالها وسحبني من ايدي طلعنه للبستان امبين يريد يرزلني وميريد اهله يسمعون
— عليش ساكته وعصر جفي حيل
–تره دتأاذيني ايدي هدها
دااسحب ايدي و شفت وحده اجت من الجهة الثانيه فاتت للمزرعه وياها ابنيه ابكد سماح تقريبا وصلن يمنه سلمن على مؤتمن رد السلام كالتله المره اعذرني يمه اتعطلت ماصار عندي فراغ وتهاني مريضه هسه يالله كدرنه نجي ان شاء الله يوم الحجه الجبيره
–ان شاء الله كالها واندر على تهاني كاللها سلامتج خير خوماكو شي
عرفتها هاي حبيبته من نبرت صوته
قبل لاترد كلتله حبيبي الجو برد وتعبت من الوكفه يلا خلي انفوت فدوه
هوه جان بحاله صدمه يباوعلي وهنه نفس الوضع سالت المره كالتله منو هاي
–هوه بده يلعثم ويباوع لتهاني رديت شنو باجي ماعرفتيني اني زوجته الجديده
–يااا واشوكت اتزوج اشو ماسمعنه
–والله زواجنه صار بغداد سوينه حفله على كدنه لان جدو مموجود وهوه جان مستعجل اتكول حطير منه ماتانه جدو يرجع
–اي شكو بيها الله يسعدكم يستاهل مؤتمن بس اشوفهج ازغيره عليه
–امم هوه هم يكول حاسبج موبس زوجتي بنتي هم كمشته ايده وحضنته واضحك خليت ايدي على صدره كلتله مو بيبي
اشوف تهاني اعيونها اتلالي وهوه يريد ياخذ نفس لو يرد بعد ميعرف والمره سحبت بتها وراحت جوه للبيت دفعني حيل جان صافن على تصرفي لباله هيج اتصرفت عليك يالله مالباله اعرف منو هاي
راد يحجي اجت سماح بيدها دبت مي انطتهيا كال مااريد وخري عن وجهي تخلص من بلوه تطلع انكس منها زلمه اشكبرني اتكليلي بيبي شنو هاي انوب
–ادلعك غير زوجي وعيب العالم اخاف اتشك اتكول ذوله شلون اتزوجو مو
–من انعل ابو اهلج لابو الناس ولابو الجابج وخلاج بسمي غزل قسمآ بالخلقج ادوسج وخليج مالج اثر لاتلعبين لعب جهال وياي
–يعني وحده تحجي ويه زوجها وادلعه اتكولها اتلعبين
–غززززل غزل مره سمعتج مرة ثانيه ادوس راسج انعدلي من تحجين
عافنه وراح جوه ضايج اشكد فرحت من شفته ضايج وخجلان من دلعي
–غزل اشسويتيله
–كولشي ماكو بس كولتله حبيبي وبيبي كدام تهاني واتغزلت بي اشويه وطلعت قصه حب بيناتنه
–خرب بغيرتج صدك تحجين بيبي راحت هيبتك يمؤتمن بس هوه جابها النفسه يستاهل شيخ والناس اتهابك جايبله طفله اطفر على راسه واتكله بيبي هههههههه اخ يمه غزل ابربج شنو رد فعله من كلتيها
–والله هيه تردين الصدك مالايكتله شكله كولش مومال حالحجي بس محد كله ياخذني بس اهم شي اثنينهم نطو ماتو
خطيه فرحت اجت شبكتني كالت بلكي الله اتفك ياخه منه واتعوفه بعد الصار بس لامؤتمن ميعوفها تدرين اذا كالتله موافقه هسه يتزوجها متعرفي اشلون يحبها
–افا عليج هسه اروح احركه ولايهمج
–صدك غزل انتي الله دزج الي
–دتعالي خلي انخرب عليهم وبعدين عود اتذكري محاسني
رحنه لغرفه العجوز لكيت المره وبتها كاعدات يم العجوز وعمتي ام مؤتمن و عمه يمهن دخلنه اني وسماح الجبانه اشكد خوثه كعدت
المره جانت اتباوعلي صفح والابنيه وجها صاير اسود وكل اشويه اشوف دمعتها تنزل وتمسحها ابسرعه متريد واحد ينتبه
كعدت مقابيلها تدرين حبيب كلبج اشسوه بيه لبالي كولها اله بس بسيطه اذا ماخليته يطفر من القهر يعني هاي انتي واخيرا شفت نقطه ضعفه وين
بس موكلش حلوه اشحب بيج صدك منكالو الحب اعمه
يعني اخذني سحل وضام حبيبته محد يوصل يمها ويخاف على مشاعرها هاي اسهل منها ماكو مؤتمن اشلون لوعت گلبي راح الوعها الك
اباوعهن مستمرات بالحجي وام اصخام مؤتمن اطفر حتى اسوالف متعرف اسولف يعني لاشكل ولاحظ
وانوب اتباوعلي وتعوج حلكها ماعاجبتها استغفر الله هاي هم اتباوعه شكلها بالمرايه لولا
وام تهاني. جا عزمتونه عليش ضميتو
جدتي. صارت ابسرعه الشغله حتى. سكتاوي جابها مناك وخلها بالغرفه تراها جابها بس حتى تبزرله ماحاسبها مره معروف اكليبه وين
–وشيفيد اكليبه اذا ميبس راسه
–لاان شاء الله گريب وهاي حتى خدامه هم جبنالها وحتى بزر لاتعب روحها وتجيب جاب التشيل عنها كل هذه انريدها بس تنور مجانها تفرح اكليبه
–شچلها موش مال خدمه هاي اخافن هم اتشل كلب بنيتي
–موهوه ابكيفها بس خلي تتنفس حرام مؤتمن يدوس راسها برجله هاي جابها حتى بس تخدمه واتبزرله مالها اي حگ غيرهن
اسمع وكلبي يفور وانوب تهاني اتباوعلي وتبتسم سويت روحي ماافتهم شنو يحجن و قاطعتهن وانداريت لعمتي ام مكرم كلتلها عمه فدوه قنعي مؤتمن اكص شعري والله موتني
–ياع عليش يعمه شعرج يخبل
–مدااكدر امشط يعني لوهوه يمشطه الي لو يبقى هيج ابيوم سماح
سماح. لاحبيبتي مؤتمن يموت على شعرج ابيومي انزله اخلي يكمل تمشيطج راضيه ولااتقهرين كلبه وتكصي
احنه كوه نحجي ومنضحك وعمتي والعجوز فاكات حلكهن شدنحجي اتخيل مؤتمن وهوه جبروته ديمشطلي كوه اسيطر من الضحك والله اذا سمع يمكن كف واحد يلطشنه اني وسماح يلزكنه بالكنتور
المره امبينه ضاجه واجهه نار
نزعت الشال وفتحت شعري نثرته عمتي اتأشرلي اتخاف من عينهن وام مؤتمن اول مره اتشوف شعري هيج مفتوح فاتحه حلكها اخر شي مااتحملت عمتي كالت يمه غزل لمي لايصير بي شي شيخلصنه من زلمتج
ام تهاني. شنهو خفتي نحسد شدعوه
سماح. لاعيني موسالفه حسد هاي مايعه قبل يومين هم فلت شعرها وتالي طاحت وضل سوده عليه للصبح محتار بيها يكول الله عوضني ماانطاني جهال وانطاني غزل مكانهم
— اي عليش لا غير حرمته بس اشوفنها ماتحجي عدل جنها لسانها معوج
–لا موجانت عايشه بره هسه تتعلم حجي احسن منه وهوه مؤتمن ميت على عوجت لسانها
–اندارت على تهاني كالتلها همس اسمعتي
ضلت العجوز اتلزك بالحجي اتخاف زعلت وتخزرنه
رجعن يسولفجن واكثر الكلمات جنت مااعرفها اسال بيها سماح وتضل تضحك عليه واترجملي بس والله شكيت اترجملي غلط لان تضحك يمكن ناصبه عليه
ام تهاني. الله يهديجن يخاله اول مره اشوف هيج اشرايج حبيبات
العجوز. تعرفين مؤتمن اذا عوجت وحده عنده يكسر راسها امشيهن عدل ان شاء الله تجي شيختهن على راسهن وتكوم تاامر وتنهي اهنا
تهاني. لاجده اني اتقدملي واحد وراح ارضه بي خوش زلمه وابن عالم مؤتمن اختار والله يهني
رديت الحمد الله هوه هم كال اكتفيت بعدجن مااشوف مره ابعيني تسون عنده اهلي وعشريتي بس اكو ناس كاسره خاطري واعدتها وبتليت ومااعرف اشلون اخلص منها
سماح. همست تره زوتيها غزل كافي جدتي راح اتكوم تحركج بسج خيه
المره كامت نكثت عباها وبتها وياها طلعن مثل الزعلانات
احنه ردنه نفلت وراها كامت كمشت عصتها وكفت كالت كربن ولجن منهو اليمشط شعرج ويخدمج
بيبي دااتشاقه
هااا تربات فريال وسمها شترجه منها يطلع كالتها وظربتني بالعصه على رجلي حسيتها طاح جلدها هيه صرخه وهيه طفره اسمع صرختها ورانا كالت يجي لومايجي اذا ماخليته يصلبج اليوم بالوهاد مااتسمه جدت السباع
–طلعنه سماح كالت يلا على غرفتج
–لافدوه اغروب والعشه بعده اضوج وحده تعالي وياي
–وين وياج لميت الملابس من الحبل ضلن فوك اريد اسفطهن
–ؤك لعد اروح وياج اسفط
–مااريد تسفيطج بس كعدي عاقله
رحت وياها لغرفتها جانت كولش نازكه وحلوه امرتبه
فتحت كنتورها اترتب واني ضليت العب بمكياجها جان اشكال عطور بس اكثرهن رجالي فتحت واحد اشتمته عرفته عطر مؤتمن دوم اشتم خال منه عيع رجعته مكانه اشكد مقرف مثل صاحبه
–الفرشه اتجنن وغرفتج كولش امرتبه
–شكرا بس غرفتج ماقاصره هم حلوه
–قصدج غرفه سمر عوفج منها – هذه كنتور مؤتمن
–اي بعدي خيه تراه يعرف اذا انمدت ايد عليه بيده امرتبه حتى اني مالي حق بس ملابسه ارتبهن
–تمام مراح العب بس شنو ذني سحبت علبه
فتحتها شفت مداليه اتجنن وسيت ذهب هم كولش نازك وحلو
–غزل ذني جان جايبهن لتهاني قبل لانتزوج يعني اعز من روحه لاتلعبين
–دانطيني مجال خلي اشوف
اخذتهن ولبست المداليه اوووي اتخبل
–اي متامل تقبل بي وياخذها
–لامااتصور بعد اليوم حتباوع بخلقته
–اتباوع لاتخافين وميته عليه بس مؤتمن محد يعرف شنهو ابراسه وهيج شامر الموضوع وره ضهره وباقي يتحركن
— هذه السيت رجعي مكانه والمداليه حلبسها عزا ابعينه اشلون امرتب كنتوره تعالي شوف كنتوري ساعه ادور يالله احصل الاريده وهاي اذا حصلته يربي اني هم ابنيه مثل باقي البنات
–ههههه تتعلمين خيه هسه ينسوج الدلال الجنتي بي يسويج ام بيت امعدله
هيه بعدها اترتب واني افتر وراها فتحت البرده انتبهت الشباج هم مقابيل بيتهم عزاا لج سماح شنو هاذه امصمم البيت على بيهم
–تره غرفتي على غرفتج عدل وطبعا اختار ذني لخاطر الاميره بس الله مبين ماقاسمله اليريده
جهز هاي الغرفه راد يتزوجها بيها تالي اخذني مكانها وجهز غرفتج لسمر واخذج مكانها
–مونيته سوء الله مراح يوفقه كمشت مداليته مثل مجاب هاي لتهاني واراح اخذها مكانها
–غزل فدوه حبيبه رجعيها تره ميرضه
–عوفج لعد اشلون اتحركين كلبه اشكد ثوله انتي
–وانتي تردين اتحركين كلبه بمداليه تره يجيبلها مكانها عشره
–مومثل هاي هسه تدرين اشكد كامشها ومتامل يشوفها بركبتها حيل بي كون يموت واتضل حسره بكلبه يردوني خدامه واجيب جهال مو سهلا
–چااشعبالج متسويها هسه اتشوفين اذا ماسوتج خدامه جوه رجلين تهاني فلا اتسمه سماح هذه حفيدها وحبيبت كلبه
–لويش متصوره راح اقبل واسكت
–موش بكيفج غصبا عنج ماعدهم مانع يصبحوج بچتله ويمسوج بچتله لمن تجين للطريق ساليني عنهم اني عايشه وياهم
–خلي اطير هيه وحفيدها والله شايفين روحهم
انفتحت الباب ودخل اثنينه سكتنه بسلا سمعنه اتفاجى بوكفتنا سوه كال خير اليوم اهنا
–هااا اليوم ابات يمها لان اخاف وحدي بالغرفه
جان مندار يريد يطلع ملابسه من كنتوره اباوع لسماح كامشه روحه لاتضحك هوه ابسرعه عاف ملابسه واندارلي مضيك اعيونه
—حركات مال زعاطيط كلش مووكتها تعبان واريد اخمد
–لعد اكو احد كمشك نام
–امم غزل بويه نزلي لعبي جوه
–هئ قررنه اني وسماح انام سوه لان اخاف وحدي كالت تعالي يمي يعني شنوو ؟
–شنهو ؟
–يعني تنزل انته اتنام جوه.
رفع حاجبه باوعلي واندار لسماح الجانت كاتمه ضحكتها هز ايده كاللها اني جبتها لروحي
مسح وجها و اجه يمي سحبني وكال اتخافين اتنامين روحي يم عمتي وهاي الغرفه متوصليها خلي عندج احساس اشويه
فتح الباب وشمرني وسد الغرفه اشكد ماعنده ذوق
نزلت شفت مكرم قبل لايحجي كلتله لاتسال علمود لاتسمع شي ميعجبك
–شال اديه بمعنا لامااسال وضحك
–وين جدو
–بعده بالديوانيه رايده شي
–لابس كلت ماله صوت لباله يم العجوز
–وين الله العجوز اتسمعج واتجلفج
— شنو انتم متتعشون
–لا انام عالخفيف عندج مانع
–هئ بس جوعانه
–غزل رجلج فوك صعديله خلي يطلبلج
لاتباوعيلي
–موعيب يم زوجته كل اشويه فايته عليهم
–لاشنو هاي معقوله انتي مطوره تعالي خويه هسه يصبون العشه
نزلت داروح ويا وسمعنه عيطت سماح ركض مكرم صعد يركض سوه الدرج خطوتين رحت ورا وصلت شفته يدك على غرفه مؤتمن فتح الغرفه وطلع كله شرايد
طلعت سماح اخدودها حمر وتبجي ركضت لمكرم هوه حضنها كلها شصاير
–مؤتمن طگني
–عليش يخوي اطگها
دفع مكرم ونزل ابسرعه مااعرفنه شنو صاير مكرم باسها وكلهه هدي هسه اشوف شنو الصار ونزل لحكه
–شنو صار لويش ضربج
–خابرته المسعده وشكتله منه
–وضربج على هاي
–لا طگني لان عترضت على زواجه منها
–عزا موهيه راح تتزوج شنو رجعتله
–موكلتلج متفوت حاله
–تعالي كافي بجي فوتي جوه هسه يجن الخبيثات يكملنها
اخذتها ودخلنه للغرفه كعدت تشتكي منه اشكد حقير اشلون ضاربها شفت جهازه على الميز يرن ميسكت هاي تبجي ابراسي وتنعه اشلون راح يتزوج ويعوفها وهذه يرن ميسكت اثوليت
كمت ردت اسكت الجهاز وصلت يمه انتبهت الرقم ومنقوش يمه نقشه مثل الزغرفه ازغيره شد انتباهي
–سماح هذه رقمها
–اي خيه رقمها شوفي بعدها تتصل اعرفنها ماراح اتفك اذا ماتسمع جاتلنه اثنينه
–الرقم السري ابسرعه
–غزل لاتوكعينه بمصيبه
–هسه انتي شكو كولي شنو الرقم قبل لايجي
–غزل اني موحمله بس عرف ضاجت اشسوه مو انوب انتي اتسويلج مصيبه
–استغفر الله من اكلج ثوله لااتزعلين اتفتحي لو افتحه ابراسج
–كوه قبلت اتفتحه بعد مااتعاركت وياها اشويه واكتلهه يالله قبلت دخلت على المسجات واشوف الغزل على حقيقته امداي اني بس اسمي كلشي ماشايفه من هيج اشياء
عرفت اسم ابو تهاني من سماح وطلعته من الجهز سويتله سكرين وسكرنت الرسائل وسويت اعاده ارسال لتهاني ورسلت منهن صور لجهاز ماما
–غزل شنو جاي اتسوين
–انتضري خلي اكمل لاتدخلين الج الصافي
–اشوف الفون رن عرفتها هيه رديت
–شيسوي النقال بيدج
–والله الفون مال زوجي بس ال — ليش متصله على واحد متزوج
–وين مؤتمن اشلون يخلي بيدج
–تره مؤتمن ومايملك لي اسمعتيني حبابه وذني السكرينات راح يوصلن لبوج اشوفه
الك —-د مالتج اشلون خالج تتمعشكين ويه واحد متزوج
–غزل اتمسحين شكو شي الي وحق الله اخلي مؤتمن يمحيج من كاعج اسمعتي
–كولش خفت ولج مشايفه هيج عين وكحه وصلفه وفوكاها تتهدد بس انطيني صبر خلي اتصل ابأبوج واشوف رد فعله لهذه الطلي شنو وعايف بته هيج
–غزل والله والله اندمج
–مم ميخالف ويلا ولي عندي مكالمه يمكن الصور وصلن واتصلو خلي ارد
سديت الجهاز بس حسيت بيها ماتت من الخوف وانوب سماح ميته خوف اكثر منها
اجه مسج فتحته لكيت ماما اتصلت ابسرعه قبل لاتحجي كلتلها ماما مووكت اشلونج فدوه ذني اتحفضيهن يمج ومسحي كلشي لااتخلين يبين ضحكت كالت عرفت بتي تاخذ حقها ومتسكت
متدري هيه بتها انسحلت سحل لمن طاح حظها سلمت عالسريع وسديته
مسحت كلشي ورجعت الجهاز لمكانه اباوع لسماح كوه كامشه ضحكتي وهيه وجها اصفر
كعدت يمها وانصح بيها لاتسكت عن حقها عالاساس اني ماخذه حقي اتمددت على جربايه واتذكرت اني مامتعشيه كلتلها تره اني جوعانه
–غزل العالم كايمه كاعده وانتي اتفكرين بطنج
–لعد شسويلكم انتو هاي مصايبكم كل يوم يعني اموت جوع
–غزل حبابه نزلي راسي مصدع
–هئ اليوم انام يمج
–انتي نويتبها من الصبح
–ولج اشبيج خلي يحس ابروحه اذا بقه بلامره اشلون يصير
–اي مو ابحالي هسه بس يأاشر بنات الديره كلهن يجن هدايه
–شنوووو لويش الامير وليم هوه كله اجلح املح
خلي اكوم اروح لغرفتي احسن مكابلج ومو اول ميجي راح أتكتين شنو سويت مااوصيج عود ضلي غبيه
عفتها وطلعت وهيه بس تصفن نزلت لكيتهم يتعشون عاديه ولاصايره مشكله ولاابد رحت كعدت يمهم مكرم جان كالب خلقته عرفته علمود سماح ومؤتمن ياكل ولاهامه شي خلصو كام يغسل همست لمكرم ولايهمك اخذت حق اختك وغمزتله اول شي صفن انوب ابتسم ودنك انتبهلنه جدو
كال ها جدي شنو الصاير
ماكو شي جدو واني خلصت الحمد الله عفته وكمت لان اذا عرف يمكن يشلع راسي رحت للغرفه سديت الباب هوووف يوم اشطوله
اتكول جنت داخل حلبه احس جسمي تعبان غسلت وغيرت ملابسي قبل لاانام فتحت الشباج اباوع لبيت التحفه تهاني هسه اشلونج اكيد متخبله حيل بيج خلي انشوف حبيب كلبج شيسوي من يعرف سويت بيج هيج سديت الشباج ورحت لفراشي
فتحت اعيوني على صوت فتحت الباب اسماح اتصيح اصخام بوجهج بغزل ولج انتحرت البت
–كمت مفزوعه منو الانتحرت
— تهاني كالتها وكعدت تلطم
–عزا العزاني مااردتها اتموت شنو سويت اني ولج ردت بس تنجر اذنها مؤتمن وين
–ولج غزل كومي انهزمي تحسلك اذا رجع يموتج
–وينه هسه
–بالمستشفى ويه اهلها من سمع الصار طلع يركض
–منو كاللكم انتم
–ولج امها خابرته الصبح ودعت علي اتكله ابسببك بتي ماتت
— يمه اكيد يموتني وراها
–كومي غزل روحي شوفيلج مكان ابسرعه انهزمي اله مؤتمن يكتلج ومحد يكدر يمنعه اتعرفي كلشي زين مسودن اشكد كلتلج لااتسوين هيج شي بس ماسمعتي هسه هيج احسن راحت الابنيه وهذه هسه يتخبل وراها اذا مالحكتيها
–وين اروح وين مكرم خلي يوديني فدوه لحكي عليه قبل لايرجع مؤتمن
اريد اكوم ابدل ملابسي وانهزم بعد مااكدر مااعرف شنو من احساس حسيت كلشي الانسان يتحمل بس ذنب روح احد لا
حسيت مثل الجبل على امتوني سببلي شلل كوه وصلت للكنتور طلعت ملابسي اريد ابدل جنت بالشافعات اتحرك عقلي ميستوعب الصار اني وين ذبين روحي لخاطر منو هيج جازفت شنو استفاديت من الصار منو يوكفلي هسه لخاطر سماح هيج سويت شنو استفاديته منها اول وحده سحبت نفسها وطلعت من السالفه وذنب روح الابنيه صار عليه ليش الانسان يكتشف الخلط بعد فوات الاوان ويندم علي دائما يتخيل روحه هوه الصح ويساعد الباقين ويحسهم قريبين منه بس يكتشف كوله وهم تزرع طيب تحصد شر محد يستاهل كلها تتخله
كملت تغير ملابسي ابسرعه بس احس روحي جثه واتحرك بلا روح داالبس حذائي انفتحت الباب كتلها خلصت يلا رفعت راسي شفت مؤتمن كدامي شكله تعبان وعيونه حمر اشرلي وين تردين
فصول الرواية: 1 2