رواية الرسم علي القلب الفصل الثاني 2 بقلم زينب محروس
هي بالفعل اتخطفت قدام عيونه و هو واقف ملحقش يتحرك، و حتي مشافش وش الشخص اللي خطفها لكنه كان نفس استايل شريف، في اللحظة دي وصل خالد اللي بمجرد نزوله من العربية، شاور له كريم بسرعة عشان يركب، و ركب هو كمان معاه، و طلب منه يتحرك بسرعة ورا العربية اللي شاور له عليها.
لكن خالد حب يستفسر عن السبب و اللهفة الشديدة في حثه على الحركة، فرد كريم باستعجال:
_ في بنت اتخطفت اتحرك بسرعة.
هو قال الجملة دي، ونقل نظره مكان العربية لكنها كانت اختفت و كأنها فص ملح و داب، فسأله خالد اللي بدأ في السواقة:
_ انهي عربية؟؟
_ اختفت، بقولك ايه رن على ابن عمك المجنون ده ليكون هو اللي خطفها.
و بالفعل اتصلوا على شريف اللي أكد لهم إنه ملهوش أي علاقة بالموضوع، فدخلوا المدرسة عشان يعرفوا اي حاجة عن نيچار أو اي طريقة يتواصلوا بها مع أهلها، و في الوقت ده وصل أبوها اللي بمجرد معرفته بالموضوع أكد لهم إن الخاطف دا هو شخص عايزه يتنازل عن المدرسة، و بالفعل و هما واقفين وصلت رسالة تهديد لوالد نيچار إنه في خلال اتناشر ساعة لو المدرسة متباعتش، محدش هيعرف طريق نيچار.
★★★★★★★