رواية أكاذيب السوشيال للضياع عبر روايات الخلاصة بقلم هاجر نورالدين
_ بتسجنيني يا ورد!
بتسجني جوزك والله لأوريكِ.
كان هيقرب مني ويضربني بس بعدت ووقفت بعيد عنهُ وشاورت للظابط اللي جاي ياخدهُ وقولت بتمثيل العياط:
= شوفت يا حضرة الظابط شوفت!
عايز يمدّ إيدهُ عليا في وجود حضرتك كمان، إثبت دي كمان في المحضر يا فندم.
جز معتصم جوزي على سنانهُ بغضب وقال من بين سنانهُ بغيظ:
_ والله يا ورد لأوريكِ، كل دا ليه يعني عشان شوية حاجات تافهة زي دي!
ربعت إيدي وقولت بغضب وإصرار:
= حاجات تافهة أيوا، 50 جرام دهب حاجات تافهة،
مامتك اللي كنت عايز تطلعها تضربني حاجات تافهة ها!
رد عليا وهو بيحاول يقنعني وقال:
_ يا ورد ما أنا هعوضك عن الدهب، يعني عشان دهب تحبسي جوزك!
رفعت راسي وقولت بتصميم وشر:
= وأحبس عيالك كمان اللي شبهك دول.
وقف مصدوم ثوانٍ وبعدين قال بتساؤل:
_ عيالي مين!
أنا لسة متجوزك من 3 شهور!
حمحمت وقولت بعد إندماجي دا:
= على إعتبار ما سيكون يعني.
إبتسم وغمزلي وقال بحنية:
_ وإنتِ عرفتي منين إنهم هيبقوا شبهي، للدرجة دي بتحبيني؟
قبل ما أرد إتكلم الظابط اللي جاي ياخدهُ وهو لسة ماسكهُ بالكلبشات في إيديه وقال بعصبية وإنفعال:
= ما تخلصوا إنتوا الإتنين بقى في ليلتكم دي بدل ما آخدكم إنتوا الإتنين والبيت كلهُ!
سكتت بصراحة وبعدها خد معتصم ومشيوا راحوا القسم،
بصراحة صعب عليا وندمت شوية وخوفت.
مش عليه لأ، خوفت منهُ دا لما يطلع من القسم هينفوخني ودا لو كان حنين معايا كمان.
ولكن هو يستاهل، من تالت شهر جواز عايز ياخد دهبي ويديه لحماتي ودا بعد ما أقنعتهُ يعمل كدا عشان الدهب معايا هيقوي قلبي عليهم وكمان عشان أختهُ متضايقش لأنها معندهاش دهب!
يعني أنا مالي ومال بنتها معاها ولا مش معاها!
ويعني إي المهر بتاعي هيقوي قلبي عليهم وليه أصلًا!
في الحقيقة رنيت على بابا بسرعة وقولتلهُ كل اللي حصل وطلبت منهُ ييجي هو وأخويا وماما وبالأخص لأني عارفة إنهُ ليه معارف في القسم وهيطلع بسرعة البرق من المأزق دا.
أول ما رد عليا سمعت صوت خبط جامد على الباب وحماتي إتكلمت بزعيق ووعيد وهي بتقول:
_ وكمان قافلة الباب بالترباس، إفتحي أحسن ليكِ يا ورد أنا والله ما هسمي عليكِ حبستيلي الواد!
يتبع…
فصول رواية أكاذيب السوشيال للضياع بقلم هاجر نورالدين
اضغط على الفصل الذي تريد قراءته:
- رواية أكاذيب السوشيال للضياع الفصل الأول
- رواية أكاذيب السوشيال للضياع الفصل الثاني
- رواية أكاذيب السوشيال للضياع الفصل الثالث
- رواية أكاذيب السوشيال للضياع الفصل الرابع
- رواية أكاذيب السوشيال للضياع الفصل الخامس
- رواية أكاذيب السوشيال للضياع الفصل السادس
- رواية أكاذيب السوشيال للضياع الفصل السابع
- رواية أكاذيب السوشيال للضياع الفصل الثامن
- رواية أكاذيب السوشيال للضياع الفصل التاسع
- رواية أكاذيب السوشيال للضياع الفصل العاشر
- رواية أكاذيب السوشيال للضياع الفصل الحادي عشر
- رواية اكاذيب السوشيال للصياع الفصل الثاني عشر
- رواية اكاذيب السوشيال للضياع الفصل الثالث عشر
- رواية اكاذيب السوشيال للضياع الفصل الرابع عشر
- رواية اكاذيب السوشيال للضياع الفصل الخامس عشر والأخير